Olımpıadalyq daıarlaý ortalyǵy dırektorynyń isi sotqa jetti
Bul týraly QR Sybaılas jemqorlyqqa qarsy is-qımyl agenttigi men QR Sport jáne dene shynyqtyrý isteri komıtetiniń birlesken jıynynda aıtyldy.
Sybaılas jemqorlyqqa qarsy is-qımyl agenttiginiń departament basshysynyń orynbasary Baýyrjan Balǵabekov sport salasynda jemqorlyqqa jol bergen tulǵalar týraly aqparat bere kele, olımpıadalyq daıarlaý ortalyǵynyń dırektoryna qarsy sotqa deıingi tergeý jumystary aıaqtalǵanyn málim etti.
«Jýyqta «Velosıped sportynan olımpıadalyq daıarlaý ortalyǵy» RMK dırektory Muqashevke qarsy sotqa deıingi tergeý jumystary aıaqtaldy. Oǵan kásiporynda is júzinde jumys istemegen adamdarǵa eńbekaqy tólegen bolyp 21 mln teńgeni ıemdenip, zańsyz jumsady degen aıyp taǵylyp otyr. Ókinishke oraı sport jáne dene shynyqtyrý salasynda mundaı zańsyzdyqtar kóptep kezdesedi», - dedi agenttik ókili.
Sport jáne dene shynyqtyrý isteri komıtetiniń zańgerlik basqarmasynyń bas sarapshysy Dınara Ábenova atalmysh is boıynsha komıtet tarapynan atqarylǵan sharalarǵa toqtaldy.
«Komıtet tórǵasynyń buıryǵymen ortalyq dırektory Muqashev, dırektordyń eki orynbasary qyzmetinen bosatyldy. Sondaı-aq, ortalyq dırektorynyń taǵy bir orynbasary Zaınýldınaǵa, bas esepshisi men kadrlar bóliminiń basshysyna qatań sógis jarııalandy. Ortalyq dırektorynyń kásiporyn qyzmetkerlerine eńbekaqy tóleý jáne syıaqy tóleý erejeleri týraly buıryǵyna ózgeris engizildi», - dedi komıtet ókili.