Olımpıadaǵa joldama sany boıynsha qaı óńir kósh bastap keledi
ASTANA. KAZINFORM – Búgin Astana qalasynda Týrızm jáne sport mınıstrligi men Olımpıadaǵa daıyndyq shtabynyń ókilderi Májilis depýtattarymen kezdesý ótkizip, 2024 jyly Frantsııanyń Parıj qalasynda ótetin tórt jyldyqytyń basty dodalary – Olımpıada jáne Paralımpıada oıyndaryna ulttyq quramanyń daıyndyǵyn baıandady.
Jıynǵa qatysqan Májilis depýtattary Ardaq Nazarov, Nurlan Áýesbaev, Dáýlet Muqaev, Qazybek Isa, Nartaı Sársenǵalıev, Nurgúl Taý, Tańsaýle Serikov mınıstrlik tarapynan atqarylyp jatqan jumystarmen tanysty.
Óz kezeginde Olımpıadaǵa daıyndyq shtabynyń jetekshisi Elsııar Qanaǵatov qazirgi tańda Qazaqstan quramasy tórt jyldyq dodaǵa qansha joldama jeńip alǵanyn ataı kele keıbir oblystyń sportshylary áli bir de bir joldamaǵa qol jetkize almaǵanyn atap ótti.
«Búgingi tańda Qazaqstan sportshylary sporttyń 17 túri boıynsha 50 lıtsenzııa (48 sportshy) jeńip aldy. Eń kóp lıtsenzııaǵa Shymkent qalasynyń sportshylary qol jetkizip otyr. Olardyń enshisinde — 10 joldama bolsa, Almaty qalasynyń sportshylarynda — 8, Shyǵys Qazaqstan oblysynda — 5, Jetisý men Túrkistan oblysynda — 4, Astana qalasy men Jambyl oblysynda — 3, Qyzylorda men Almaty oblysy — 2, SQO, BQO, Aqmola, Abaı, Qaraǵandy, Aqtóbe oblystarynda bir-birden lıtsenzııa bar. Ókinishke qaraı Qostanaı, Mańǵystaý, Atyraý, Ulytaý jáne Pavlodar oblysynyń sportshylary áli bir de bir joldama ala almaı keledi. Árbir jergilikti oblystyq sport basqarmalary bul olqylyqtyń ornyn toltyrýy tıis» dedi Elsııar Qanaǵatov.
Sonymen qatar shtab basshysy alda, ıaǵnı mamyr aıynda Qazaqstan quramasyn taǵy da kóptegen lıtsenzııalyq týrırler kútip turǵanyn, joldamalar sany áli de arta túsetinin jetkizdi.
«Mamyr aıynda dzıýdodan álem chempıonatyna jáne kórkem gımnastıka men sporttyq gımnastıkadan Azııa chempıonattary ótedi. Budan bólek, sportshylarymyz 15-ke jýyq álemdik, azııalyq reıtıngtik halyqaralyq irikteý týrnırlerinde óner kórsetedi. Jospar boıynsha mamyr aıynda sportshylarymyz kem degende 20 joldama alýy qajet. Al Olımp oıyndaryna deıin jalpy 80-ge jýyq joldamaǵa qol jetkizemiz degen josparymyz bar» dedi shtab basshysy.
Sondaı-aq, depýtattar J. Úshkempirov atyndaǵy jekpe-jek saraıynda dzıýdoshylardyń OQJ qatysyp, sportshylarmen tildesti. Sońynan Qazaq kuresi akademııasy tárbıelenýshileriniń jattyǵýyn tamashalady.
Eske sala ketsek, bıylǵy XXXIII jazǵy Olımpıada oıyndary 26 shilde-11 tamyzy aralyǵynda ótedi.
Oǵan dúnıejúziniń 205 elinen 10 500 sportshy qatysady dep josparlanyp otyr. Sporttyń 32 túrinen 329 medal jıyntyǵy sarapqa salynady.
Al XVII jazǵy paralımpıada oıyndary 28 tamyz — 8 qyrkúıek aralyǵynda ótedi.
Sporttyń 22 túrinen 184 memleket 549 medal jıyntyǵyn saralaıdy.
Jazǵy sport oıyndary boıynsha búgin el qorjyny taǵy bir medalmen tolyǵyp, sporttyń 17 túrinen 50 lıtsenzııaǵa jetti.
Paraoıyndar boıynsha Qazaqstan quramasynda sporttyń 7 túrinen 11 lıtsenzııa bar.
