Olımpıadaǵa irikteý týrnıri: qazaqstandyq boksshylar qashan sharshy alańǵa shyǵady

ASTANA. KAZINFORM - Taıland astanasy Bangkok qalasynda ótip jatqan bokstan Olımpıadaǵa irikteý týrnırinde qazaqstandyq boksshylardyń qashan saıysqa túsetini belgili boldy.

El quramasynan úsh boksshy jarys jolyn jalǵastyryp jatyr.

Erteń, 31 mamyrda Muhammedsabyr Bazarbaıuly (63.5 keli) men Nazym Qyzaıbaı (50 keli) kúndiz sharshy alańǵa shyqsa, Valentına Halzovanyń aldaǵy jekpe-jegi 1 maýsymǵa belgilengen.

Muhammedsabyr 1/4 fınalda kýbalyq Erıslandı Alvarespen qolǵap túıistirse, Nazym Qyzaıbaı koreıalyq Djýhıýng Djýng 1/16 fınalda sharshy alańǵa shyǵady.

Al Valentına Halzovanyń 1/8 fınaldaǵy qarsylasy –mońǵolııalyq Erdenetýıa Enhbaatar.

Úsh salmaq dárejesinde de jartylaı fınalǵa shyqqan sportshylar Olımpıada joldamasyna ıe bolady. Sondaı-aq 63.5 kelide jartylaı fınalda jeńilgen boksshylar arasynda qosymsha bir lıtsenzııa sarapqa salynady.

Aıta ketsek, elimizdiń erler quramasynda Olımpıadaǵa Sáken Bıbosynov (51 keli), Mahmud Sabyrhan (57 keli), Aslanbek Shymbergenov (71 keli), Nurbek Oralbaı (80 keli), Aıbek Oralbaı (92 keli) jáne Qamshybek Qońqabaev (92 keliden joǵary) joldama alyp qoıdy. Áıelder quramasynda Karına Ibragımova (57 keli) Parıj Olımpıadasyna joldama alǵan edi.

Taılandtaǵy irikteý týrnırinde Uljan Sársenbek (54 keli), Rımma Volosenko (60 keli) men Natalıa Bogdanova (66 keli) jarys jolyn aıaqtady.