Olımpıadaǵa irikteý: qazaqstandyq short-trekshiler mańyzdy maýsymǵa daıyndyqty bastap ketti
ASTANA. KAZINFORM – Qazaqstan short-trek quramasy 2026 jylǵy Olımpıada oıyndaryna baılanysty asa mańyzdy bolǵaly turǵan jańa maýsymǵa daıyndyqtyń kelesi kezeńine kiristi. Qazirgi ýaqytta ulttyq qurama Astanada oqý-jattyǵý jıynyn ótkizip jatyr. Bul týraly Olympic.kz jazdy.
Aıta keteıik, bul Petr Gamıdov baptaıtyn komanda úshin bıylǵy alǵashqy jıyn emes.
Sáýir men tamyz aralyǵynda qazaqstandyq short-trekshiler eki birdeı jattyǵý jıynyn ótkizdi. Olımpıadalyq maýsymǵa daıyndyq sáýir aıynyń ortasynda bastaldy. Buǵan deıin sportshylar Álem kýbogy kezeńderi, Azııa oıyndary jáne álem chempıonaty syndy mańyzdy jarystarǵa qatysyp, az ýaqyt demaldy. Ásirese, álem birinshiliginde Denıs Nıkıshanyń kúmis júldesi — maýsymnyń basty jetistikteriniń biri boldy.
Maýsym óte qarqyndy ári kúrdeli ótti. Biraq tabysty boldy. Denıs Nıkıshanyń joǵary nátıjesi, Harbınde ótken Azııa oıyndaryndaǵy tarıhı altyn medal, sondaı-aq Álem kýbogynyń birneshe kezeńindegi kórsetkishter — sonyń dáleli. Quramaǵa demalýǵa kóp ýaqyt berilmedi. Óıtkeni alda tek Olımpıada ǵana emes, sonymen qatar oǵan irikteý kezeńderi de kútip tur.
2026 jylǵy Olımpıada oıyndaryna joldama alý úshin short-trekten Álem kýbogynyń lıtsenzııalyq kezeńderine qatysý qajet. Jeltoqsan aıynda bul jarysqa qatysatyn barlyq el belgili bolady. Qazaqstan quramasy aldaǵy Olımpıadada júldeli oryndarǵa talasa alady. Qazir barlyq kúsh-jiger daıyndyqqa jumsalyp otyr.
— Qazirgi ýaqytta jospar boıynsha daıyndalyp jatyrmyz. Maýsymǵa sáýirdiń ortasynda kiristik. Aldymen Túrkııada velodaıyndyq jasadyq. Mamyr aıynda taýly jerde oqý-jattyǵý jıynyn ótkizdik. Sol aıdan bastap, muzǵa shyqtyq. Qazir Astanada úshinshi jıynymyz ótip jatyr. Álem kýbogynyń irikteý kezeńderine deıin elordada jattyǵýdy jalǵastyramyz, — dedi bas bapker Petr Gamıdov.
Mamannyń aıtýynsha, daıyndyq josparly túrde júrip jatyr. Maýsymaralyq kezeńde josparlanǵan jumystardyń bári oryndalýda. Quramnyń negizgi oıynshylary qatarda, eleýli ózgerister joq. Sonymen qatar jattyqtyrýshy komanda ishinde de irikteý bolatynyn atap ótti.
— Quramanyń qazirgi jaǵdaıy jaqsy. Jattyǵý úderisi turaqty. Bári óz jolymen júrip jatyr. Barlyq maman qyzmet atqarýda, júıe durys jolǵa qoıylǵan. Qyrkúıektiń 10-15 aralyǵynda ishki irikteý ótkizemiz. Sol irikteýdiń qorytyndysy boıynsha Olımpıadada el namysyn qorǵaıtyn quramany anyqtaımyz, — dedi ol.
Aıta keterligi, Olımpıadaǵa baratyn quramaǵa avtomatty túrde engen birden-bir sportshy — Denıs Nıkısha. Bul sheshim 2025 jylǵy álem chempıonatynan keıin qabyldanǵan. Esterińizge sala keteıik, Nıkısha mansabynda ekinshi ret álem birinshiliginde kúmis medal ıelendi.
Bıyl ótetin alǵashqy tórt Álem kýbogy kezeńi (qazan jáne qarasha aılarynda) sheshýshi bolmaq. Ár qashyqtyq boıynsha lıtsenzııalar sol jarystarda sarapqa salynady. Reıtıng te úlken ról atqarady. Sondyqtan basty maqsat — barlyq kezeńde joǵary nátıje kórsetý. Budan bólek, komanda estafetada sátti óner kórsetse, qosymsha olımpıadalyq joldamaǵa qol jetkizedi.
Al 2026 jylǵy Olımpıada oıyndaryna tikeleı daıyndyq qańtar aıynda bastalady.
Buǵan deıin habarlanǵandaı, qazaqstandyq mánerlep syrǵanaýshylar Asian Figure Skating Youth Camp lagerine qatysady.