Olımpıadaǵa qatysyp, el namysyn qorǵaý - basty armanym - Anıta Nagaı
ORAL. QazAqparat - Aldaǵy jyly Ońtústik Koreıanyń Phenchhan qalasynda ótetin qysqy olımpıada oıyndaryna qatysyp, el namysyn abyroımen qorǵaý - basty armanym. Bul týraly short-trekten Qazaqstan ulttyq quramasynyń múshesi Anıta Nagaı málim etti, dep habarlaıdy «QazAqparat» HAA tilshisi.
Nebári on segiz jastaǵy Anıta Nagaı sporttyq jolynda qazirdiń ózinde úlken tabystarǵa qol jetkizip keledi. Ótken jyly Norvegııanyń Lıllehammer qalasynda jasóspirimderdiń qysqy olımpıadasynda aralas komandalyq jarysta qola medaldi ıelenip, mamandardyń nazaryn aýdarǵan Anıta bıyl da sátti óner kórsete bildi. Aldymen Almatyda dúnıejúzilik HHVІІІ qysqy ýnıversıadada, sodan keıin Sapporo qalasynda VІІІ qysqy Azııa oıyndarynda Qazaqstan quramasy sapynda estafetalyq jarysta qola júldeni ıelendi.
Anıtanyń ákesi Artýr Vıktorovıch «Jaıyqjylýqýat» AQ-ǵa qarasty Oral jylý-qýat ortalyǵynda kartel tsehynyń mashınısi bolsa, anasy Aınagúl Temirjanqyzy da osy kásiporynda jumys jasaıdy. Anıtany kishkentaı kezinen sportpen dostastyrǵan buryn jabyq muz aıdyny sport saraıynda eńbek etken ákesi edi. Toǵyz jasynan short-trekke birjola bet burǵan Anıta Nagaı sodan beri tynbaı jattyǵyp keledi. Memlekettik tilde taza sóıleıtin Anıta Batys Qazaqstan ınnovatsııalyq-tehnologııalyq ýnıversıtetinde dene shynyqtyrý jáne sport mamandyǵy boıynsha 1 kýrsta bilim alýda. Osydan eki kún buryn qysqy Azııa oıyndarynan oralǵan Anıta Nagaıdy BQO dene shynyqtyrý jáne sport basqarmasynyń basshysy Ásııa Amanbaeva bastaǵan sport súıer qaýym, ózi jattyǵatyn jabyq muz aıdyny sport saraıynyń ujymy, bapkeri Maksım Lozovoı, ýnıversıtette birge oqıtyn stýdentter temir jol vokzalynan erekshe qoshemet kórsetip, kútip alǵan-dy.
«Bapkerlerime, ata-anama, qýanyshymdy bóliskenderdiń bárine rızamyn. Bul maǵan odan da úlken jaýapkershilik júkteıdi. Aldaǵy jarystarda sheberlikke qosa sáttilik joldas bolyp, kelesi jylǵy olımpıada oıyndaryna joldama alsam ba deımin. Biz otbasynda bes qyzbyz. Sondyqtan bizdi osy kúnge jetkizgen anamdy, sondaı-aq baýyrlarymdy, barsha arýlardy Halyqaralyq áıelder kúnimen quttyqtap, eń izgi tilekterimdi bildirgim keledi. Bes qyzy men súıikti jaryn qurmettep, tóbesine kóterip kele jatqan asqar taýdaı ákemniń de, árıne, orny bólek qoı. Osyndaı janashyr jandar barda Qazaq eliniń kók baıraǵy bıikte jelbireýi úshin bar kúsh-jigerimdi jumsaı beretinim anyq. Azdaǵan demalystan keıin Astanaǵa baryp, jattyǵýǵa qaıta kirisemin», dedi «QazAqparat» tilshisine Anıta Nagaı.
Eske sala keteıik, eki kúnnen keıin Gollandııanyń Rotterdam qalasynda short-trekten bastalatyn álem chempıonatynda Qazaqstan quramasy sapynda Abzal Ájiǵalıev, Nurbergen Jumaǵazıev, Aıdar Bekjanov, Denıs Nıkısha jáne Anastasııa Krestova jarys jolyna shyǵady. «Qyzǵaldaqtar elinen» de jaqsy jańalyqtar kútemiz.
