Olımpıadaǵa qatysqan bir top qazaqstandyq sportshy elge oraldy
NUR-SULTAN. QazAqparat - Búgin bas qalamyzdyń halyqaralyq áýejaıyna Beıjińde ótip jatqan qysqy Olımpıadaǵa qatysýshylar - frıstaıl-mogýldan Qazaqstan ulttyq quramasy ushyp keldi, dep habarlaıdy QazAqparat Mádenıet jáne sport mınıstrligine silteme jasap.
Sportshylardy Mádenıet jáne sport mınıstrliginiń ókilderi men jankúıerler qarsy aldy.
«Sport - baq pen bap qatar júretin sala. Tórt jylda bir keletin dúbirli dodada bar kúshterińizdi salyp, jigerlerińizdi kórsettińizder. Biz sizderdi qashanda qoldaýǵa daıynbyz. Jarqyn jeńisterińizdiń áli de alda ekendigine senimimiz mol» -dedi QR MSM Sport jáne dene shynyqtyrý isteri komıteti tóraǵasynyń orynbasary Aıgúl Bektenova.
Esterińizge sala keteıik, baıraqty básekede frıstaıl-mogýlda ulttyq qurama sapynda alty sportshy el namysyn qorǵady.
Olardyń qatarynda ıÝlııa Galysheva men Dmıtrıı Reıherd fınalǵa joldama alyp, ıÝlııa on birinshi, al Dmıtrıı segizinshi orynǵa jaıǵasty.
