Olımpıadaǵa qatysatyn QR sportshylarynyń sımvolyn ázirleýge baıqaý jarııalandy

NUR-SULTAN. QazAqparat - Qazaqstan Ulttyq Olımpıada komıteti Olımpıada oıyndaryna qatysatyn sportshylarymyzdyń sımvolyn ázirleýge ashyq baıqaý jarııalady, dep habarlaıdy QazAqparat.

Atap aıtqanda, «TeamKZ» jazýynyń úlgisin jáne logotıptiń grafıkalyq keskinin daıyndaýǵa konkýrs jarııalanyp otyr.

Jumystar 21 sáýir - 2 mamyr aralyǵynda qabyldanady. Baıqaýdyń júlde qory 1 mıllıon teńgeni quraıdy.

Jeńimpazdy anyqtaý úsh kezeńnen turady. Baıqaý jumystarynyń alǵashqy irikteýin UOK komıssııasy ótkizedi. Onyń quramyna Olımpıadalyq komıtettiń qyzmetkerleri, sportshylar, jattyqtyrýshylar men dızaıner kiredi.

Ekinshi kezeń 4-5 mamyrda Olympic.kz saıtynda daýys berý arqyly júrgiziledi. Onda jankúıerler úzdik jumystardyń short-tizimin anyqtaýǵa kómektesedi.

Úshinshi kezeń ótetin 6-8 mamyr aralyǵynda iriktelgen jumystar Qazaqstannyń ulttyq komandalarynyń sportshylaryna jáne olımpıadalyq sport túrleri boıynsha ulttyq federatsııalarǵa jiberiletin bolady. Ár komanda men federatsııadan bir daýys esepteledi. Kóp daýys jınaǵan jumys baıqaý jeńimpazy atanady.

Nátıjeler 11 mamyrda www.olympic.kz saıtynda jarııalanady. Birinshi oryn alǵan jumystyń avtoryna 700 myń teńge beriledi. Sondaı-aq 150 myń teńgeniń eki yntalandyrý syılyǵy bar. Baıqaý týraly erejeni Qazaqstan UOK saıtynda konkýrstyń arnaıy bóliminde tabýǵa bolady.
«Jazǵy Olımpıada oıyndary bıyl, al qysqy Olımpıada oıyndary kelesi jyldyń basynda ótetindigin eskersek, jarystyń mańyzy arta túsedi. Sondyqtan, Ulttyq Olımpıada komıteti barlyq shyǵarmashylyq adamdardy, sondaı-aq Qazaqstannyń olımpıadalyq komandasynyń jankúıerlerin belsendi qatysýǵa jáne el olımpıadasynyń sımvolyn jasaýǵa úles qosýǵa shaqyrady», - delingen UOK saıtynda.