Olımpıadaǵa irikteý týrnıri: Serik Temirjanov Irak boksshysyn súrindirdi
NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde sharshy alańǵa shyqqan jerlesimiz Serik Temirjanov ta alǵashqy jekpe-jegin jeńispen bastady, dep habarlaıdy QazAqparat tilshisi.
57 keli salmaqta el namysyn qorǵap jatqan Temirjanov birinshi aıqasyn Iraktan kelgen boksshyǵa qarsy ótkizdi. Asa tartysty ótken jekpe-jek qorytyndysy boıynsha tóreshiler bir aýyzdan qazaqstandyq boksshyny jeńimpaz dep tapty.
Osylaısha Ǵalymbek Kenjebaev baptaıtyn ulttyq qurama boksshylarynan sharshy alańǵa shyqqan 6 boksshy da alǵashqy qarsylastarynan basym túsip, kelesi satyǵa ótti. Olar ázirge jeńilissiz kele jatyr.
Osyǵan deıin habarlaǵanymyzdaı, erler arasynan sharshy alańǵa birinshi bolyp shyqqan 63 keli salmaqta Zákir Safıýllın, ekinshi ret sharshy alańǵa kóterilgen 81 keli salmaqtaǵy Bekzat Nurdáýletov jáne qazaqstandyqtar sapynan erler arasynda úshinshi bolyp aıqasyn ótkizgen 75 keli salmaqtaǵy Ábilhan Amanqul, 69 keli salmaqta Abylaıhan Júsipov jáne 52 keli salmaqta Sáken Bıbosynovtar alǵashqy aıqasyn jeńispen bastaǵany týraly jazǵan bolatynbyz .
Jalpy, bul Amman qalasynda ótip jatqan olımpıadalyq irikteý týrnırine bas bapker Kenjebaev 8 boksshyǵa úmit artyp alyp kelgen bolatyn.
Olar 52 keli salmaqta Sáken Bıbosynov, 57 kelide Serik Temirjanov, 63 keli salmaqta Zákir Safıýllın, 69 kelide Abylaıhan Júsipov, 75 keli salmaqta Ábilhan Amanqul, 81 kelide Bekzad Nurdáýletov, 91 keli salmaqta Vasılıı Levıt jáne asa aýyr salmaqta (+91) Qamshybek Qońqabaev bar.
Endi, erler quramasynan olımpıadalyq irikteý týrnıinde áli sharshy alańǵa shyqpaǵan eki boksshymyz qaldy. Olar: 91 keli salmaqtaǵy Vasılıı Levıt pen aýyr salmaqtaǵy (+91) Qamshybek Qońqabaev.
