Olımpıadaǵa irikteý týrnıri: Sáken Bıbosynov alǵashqy aıqasyn jeńispen bastady

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde sharshy alańǵa shyqqan jerlesimiz Sáken Bıbosynov alǵashqy jekpe-jegin jeńispen bastady, dep habarlaıdy QazAqparat tilshisi.

52 keli salmaqta Olımpıada joldamasyna talasyp jatqan Bıbosynov birinshi jekpe-jeginde qyrǵyzstandyq qarsylasynan aılasyn asyrdy.

Endi, sanaýly mınýttardan keıin erler arasynda Serik Temirjanov (57 keli) sharshy alańǵa shyǵady.

Osylaısha Ǵalymbek Kenjebaev baptaıtyn ulttyq qurama boksshylary ázirge jeńilissiz kele jatyr.
Buǵan deıin habarlaǵanymyzdaı, erler arasynan sharshy alańǵa birinshi bolyp shyqqan 63 keli salmaqta Zákir Safıýllın, ekinshi ret sharshy alańǵa kóterilgen 81 keli salmaqtaǵy Bekzat Nurdáýletov jáne qazaqstandyqtar sapynan erler arasynda úshinshi bolyp aıqasyn ótkizgen 75 keli salmaqtaǵy Ábilhan Amanqul, 69 keli salmaqta Abylaıhan Júsipov ta alǵashqy jekpe-jegin jeńispen bastaǵany týraly jazǵan bolatynbyz.