Olımpıadaǵa irikteý týrnıri: Búgin sharshy alańǵa 3 boksshymyz shyǵady

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde «qazaqtyń» salmaǵy atanyp ketken – 69 kelide Abylaıhan Júsipov sharshy alańǵa shyǵady, dep habarlaıdy QazAqparat tilshisi.

Abylaıhan Júsipovpen birge eki boksshy arýymyz da sharshy alańǵa shyǵady.

Atap aıtar bolsaq, qyzdarymyzdan 69 kelidegi Valentına Halzova Ońtústik Koreıa ókili Sıýen Choımen judyryqtasady. 75 kelidegi Nadejda Rıabets ózbekstandyq Navbahor Hamıdovamen kezdesedi.

Úsh boksshymyz da Nur-Sultan ýaqytymen 21:00-de bastalatyn keshki sessııada óner kórsetedi.

Esterińizge sala keteıik, osyǵan deıin Ǵalymbek Kenjebaev baptaıtyn erler quramasynan úsh boksshy sharshy alańǵa shyǵyp, úsheýi de alǵashqy aıqastaryn jeńispen bastaǵan bolatyn. Olar – 63 keli salmaqta Zákir Safıýllın, 81 keli salmaqta el namysyn qorǵap jatqan Bekzat Nurdáýletov jáne 75 keli salmaqta judyryqtasqan Ábilhan Amanqul.

Al Erik Alǵabek jattyqtyratyn qyzdar komandasynan alǵashqy jarys kúni eki boksshy qyzymyz alǵashqy jekpe-jekterine shyǵyp, ekeýi de birinshi aıqastarynda qarsylastarynan utyldy. Atap aıtsaq, lıtsenzııa úshin talasty birinshi bolyp bastaǵan Dámetken Kelimbet (57 keli) qytaılyq In ıÝnhýaǵa jol berse, Rımma Volosenko (60 keli) úndistandyq Sımrandjıtkaýr Baattan jeńildi.