Olımpıadaǵa irikteý: Sý dobynan Qazaqstan áıelder quramasy Nıderlandydan jeńildi
NUR-SULTAN. QazAqparat - Italııanyń Trıest qalasynda sý dobynan Tokıo Olımpıadasyna irikteý týrnırinde Qazaqstan áıelder quramasy endi 5-8 oryndar úshin synǵa túsedi, dep habarlaıdy QazAqparat tilshisi.
Qazaqstandyq vaterpolshylar shırek fınalda Nıderlandy qyzdaryna jol berdi. Esep 6:19 (1:5, 2:4, 0:4, 3:6). Qazaqstan quramasynan Aıjan Aqylbaeva, Darıa Roga, Anna Týrova (2), Darıa Mýraveva jáne Anastasııa Eremına mergendik tanytty.
Endi qazaqstandyq sportshylar 5-8 oryndar úshin Slovakııamen sheberlik baıqasady. Sondaı-aq, jarystyń atalǵan satysynda Frantsııa men Izraıl quramalary kezdesedi. Jeńgen quramalar 5-6, jeńilgenderi 7-8 oryn ıelerin anyqtaıdy.
Esterińizge sala ketelik, Qazaqstan qyzdary V tobynda synǵa tústi. Alǵashqy oıynda Grekııadan 5:13, odan keıin Vengrııadan 6:23 esebimen jeńildi. Sońǵy oıynda Izraılmen 7:7 esebimen teń oınady.
Aıta keteıik, irikteý týrnırinde jartylaı fınalda Nıderlandy men Grekııa, Vengrııa men Italııa quramalary synǵa túsedi. Olımpıadaǵa eki joldama beriledi. Jeńgen eki qurama fınalda, jeńilgenderi 3 oryn úshin saıysqa túsedi. Іrikteý týrnıri 24 qańtarda máresine jetedi.
Esterińizge sala ketelik, Qazaqstan quramasy Olımpıadada eki márte baq synady. 2000 jyly - 6, 2004 jyly - 8 oryn aldy.
