Olımpıadaǵa irikteý: Qazaqstannyń erler quramasy birinshi oıynda jeńilip qaldy

NUR-SULTAN. QazAqparat - Búgin Qazaqstan erler quramasy Qytaıdyń Tszıanmyn qalasynda Tokıo Olımpıdasyna irikteý týrnırin bastady, dep habarlaıdy QazAqparat tilshisi.

Qazaqstandyq voleıbolshylar alǵashqy týrda Qytaımen sheberlik baıqasty. Qarsylas Azııa qurlyǵyndaǵy tájirıbeli quramanyń biri sanalady. Qytaı quramasy 1984, 2008 jyldary Olımpıada oıyndarynda baq synady. 1978, 1982 jyldarda álem chempıonatynda eetinshi oryn aldy. Azııa chempıonatynda 1979, 1997, 1999 jyldarda chempıon atanǵan.

Búgingi kezdesýde oıyn barysynda qytaılyq voleıbolshylar basymdyq tanytty. Birinshi sette qazaqstandyq sportshylar olarǵa 19:25 esebimen ese jiberse, odan keıin 14:25, 18:25 esebimen jeńilip qaldy. Osylaısha qazaqstandyq voleıbolshylar qarsylasyna jalpy esepte 0:3 esebimen jol berdi.

Esterińizge sala ketelik, Qazaqstan quramasy A tobynda Iran, Qytaılyq Taıbeı, Qytaı quramalarymen sheberlik baıqasady. Endi olar 8 qańtarda Iran, 9 qańtarda Qytaılyq Taıbeı quramalarymen oınaıdy.

Azııa qurlyǵy boıynsha V tobynda Avstralııa, Ońtústik Koreıa, Úndistan jáne Katar voleıbolshylary joldamaǵa talasady. Jartylaı fınal men fınal 11-12 qańtarda ótedi. Jeńimpaz Olımpıadaǵa Azııa qurlyǵynan berilgen jalǵyz joldamaǵa ıe bolady.

Aıta keterligi, búgingi kúnge deıin Qazaqstan quramasy Olımpıadaǵa birde-bir márte qatysyp kórgen joq. Al álem chempıonaty fınaldyq kezeńinde 2002, 2006 jyldarda synǵa tústi.

Búgin voleıboldan Qazaqstan qyzdar quramasy Taılandtyń Nakhonratchasıma qalasynda Tokıo Olımpıadasyna irikteý oıyndaryn jeńispen bastady.