Olımpıadaǵa deıin babyma kelemin - Denıs Ten
Onyń aıtýynsha, tobyǵyn qalpyna keltirýdegi ońaltý em-domy 150 kúnge sozylǵan. Qazirgi ýaqytta mánerlep syrǵanaýshy fızıoterapııa alyp, býyndaryn kúsheıtýge arnalǵan jattyǵýlardy jasaýda. Sonymen qatar toqsan saıyn ekpe saldyryp, zalda kóp jumys isteýde.
«Aıaǵymdy rekýperatsııalaý boıynsha 2018 jylǵy birinshi (sońǵy dep úmit artamyn) tekserýi. Búgin magnıttik-rezonanstyq tomografııa býyndardyń bir-birimen baılanysa bastaǵandyǵyn kórsetti, sonymen birge súıektiń qantalaýy azaıdy. Eger birinshisi aıaqty turaqsyzdandyrsa, ekinshisi kenetten aýyrtyp jiberetin. Tolyqtaı qalypqa kelý úshin áli de shamamen 6 aı qajet. Degenmen, Olımpıadaǵa qaraı ońtaıly kúıge kelemin», - dep jazdy sportshy Instagramdaǵy paraqshasynda.
Denıs Ten buǵan deıin jattyǵýlar barysynda sekirgennen keıin oń aıaǵymen ǵana jerge taban tireı alǵandyǵyn, al qazir qarǵı alatyn bolǵanyn atap ótken.
«Bul áli de bolsa aýyrtyp jiberedi. Biraq, endi júktemeni arttyrýǵa da bolady. Árıne, mundaı jetistik qýantarlyq emes. Degenmen, 3 apta buryn alǵash ret jattyǵý barysynda lýtts (oń aıaqpen oryndalady) sekirdim, flıpti odan sál erterek jasaı bastadym. Qarqyndy kezeń týyp keledi», - dedi mánerlep syrǵanaýshy.
Aıta keteıik, 2018 jyldyń 9-25 aqpany aralyǵynda Ońtústik Koreıanyń Phenchhan qalasynda qysqy Olımpıada oıyndary ótedi. Álemniń 80 elinen 5 myńnan astam sportshy men resmı ókil qatysatyn aq Olımpıadada sporttyń 15 túrinen 102 medal jıyntyǵy sarapqa salynbaq. Al Qazaqstan sportshylary bıatlon, mánerlep syrǵanaý, taý shańǵysy jarysy, short-trek, konkımen syrǵanaý, shana sporty, shańǵy tebý, tramplınnen shańǵymen sekirý, frıstaıl (akrobatıka, mogýl) syndy sporttyń 9 túrinen el namysyn qorǵaıtyn bolady. Búginge deıin el qorjynynda 30 joldama bar.
