Olımpıadaǵa daıyndyq: Parıjde Sena ózeniniń sýy lastanýyna baılanysty trıatlonnan jarys toqtatyldy

ASTANA. QazAqparat – Olımpıadanyń bastalýyna bir jyl qalǵanda Frantsııa astanasynda trıatlonnyń júzý kezeńi ótpeıtini belgili boldy. Ázirge bılik ókilderi júzýshilerdiń qaýipsizdigine kepil bola almaıdy, dep habarlaıdy QazAqparat Euronews-ke silteme jasap.

Parıj Olımpıadasyna bir jyl qalǵanda Senadaǵy sý sapasy áli de ózekti másele bolyp tur.
Birneshe kún buryn ǵana sportshylar trıatlonnan test jarystarynyń jeke kezeńi aıasynda ózenge Aleksandra ІІІ kópirinen túsken bolatyn. Biraq jeksenbi kúni bakterııa kólemi kóp ekeni, sý júzýge jaramsyz ekeni anyqtalyp, júzýden aralas estafeta ótken joq. Trıatlon dýatlonmen, ıaǵnı júgirý jáne velojarys kezeńderin kezektestirýmen almasty.
Jaqynda para-trıatlonshylarda da osyndaı jaǵdaı boldy.
«Biz áli de sý sapasy neden nasharlaǵanyn túsine almaı jatyrmyz. Sýdyń eki synamasy sapanyń nashar ekenin, ıaǵnı normadan aýytqyǵanyn kórsetti. Qazir biz qaıdan lastanyp jatqanyn anyqtaý úshin tergeý júrgizip jatyrmyz», - dedi 2024 jylǵy Olımpıada oıyndaryn ótkizýge jaýapty Parıj meriniń orynbasary.
Sý sapasyna kúmán týyndaǵan soń tamyzdyń basynda Senada ótetin jarystar toqtatylǵan. Sol kezde uıymdastyrýshylar nóser jaýyn saldarynan ishek taıaqshasy bakterııalary kontsentratsııasy ósip, sý lastandy dep málimdegen bolatyn. Bul joly sebep anyqtalmady.
Parıj bıligi ashyq sýdaǵy jarystarǵa áli de bás tigip otyr. «Parıj 2024» uıymdastyrý komıtetiniń basshysy Tonı Estangeniń sózinshe, «B jospary joq».
Sena ózenin parıjdikter shomyla alatyndaı qaýipsiz etýdi bılik birinshi jyl ýáde etip otyrǵan joq. Astana merııasy taza ózen Olımpıadadan qalǵan mura bolady dep úmittenedi.