Olımpıadaǵa barýǵa tyrysamyn - Dosjan Qartyqov

ASTANA. QazAqparat - Grek-rım kúresinen Azııa chempıony Dosjan Qartyqov 2020 jylǵy Tokıo Olımpıadasyna qatysýdy kózdeıdi. Soǵan bar kúsh-jigerin salýǵa múddeli, dep habarlaıdy QazAqparat tilshisi.

«Osy ýaqytqa deıin deıin biz Taraz qalasynda boldyq. Ol jaqta oqý-jattyǵý jıyndary ótti. Endi, aldaǵy sáýir aıynda Álem kýbogy bar. Soǵan daıyndalamyz. Odan keıin mamyr aıynda Qazaqstan chempıonaty bolady. Sol kezde birinshi jáne ekinshi nómirler anyqtalady», - dedi D.Qartyqov QazAqparat tilshisine bergen suhbatynda.

Onyń aıtýynsha, Rıo Olımpıadasynan keıin birshama tájirıbe bar. Alaıda Tokıoǵa joldama alý úshin áli biraz jumys jasaý qajet. «Bir Olımpıadadan óttik, kórdik. Endi, bolashaqta 2020 jyldaǵy Olımpıadaǵa bar kúsh-jigerdi salyp, ter tógip, jumys isteý kerek. Ol úshin bıylǵy Qazaqstan chempıonatynan ótý qajet. Sosyn kelesi jyldan bastap joldamalar oınatylady. Álem chempıonatynda altynshy orynǵa deıin beriledi. Budan bólek, Azııa chempıonaty taǵy bar. Ol jerde birinshi jáne ekinshi oryn alǵandarǵa joldamalar taratylady. Negizi, qazirgi kezde sportshylar arasyndaǵy báseke qatty bolyp tur. Osydan bes-alty jyl buryn, kóbinese, Reseı men Iran palýandary jeńis tuǵyrynan kórinetin edi. Qazir jan-jaqtyn - Koreıadan, Japonııadan, ózimizdiń kórshimiz qyrǵyz ben ózbek palýandarynan myqty sportshylar shyǵyp jatyr», - dep atap kórsetti D.Qartyqov.

Aıta keteıik, osydan úsh jyl buryn AQSh-tyń Las-Vegas qalasynda ótken Álem chempıonatynda Dosjan Qartyqov (75 kelige deıin) qola júldege qol jetkizgen bolatyn. Sonyń arqasynda Rıo Olımpıadasynyń joldamasyn jeńip aldy. Al Olımpıada oıyndary kezinde birinshi aınalymda óz qarsylasyn jeńse, ekinshi aınalymda utylyp qaldy.

Foto: Kazakhstan Wrestling Online | Balýandar shańyraǵy- vk.com