Olımpıadaǵa barý – basty armanym – Nursultan Zaızaǵalıev

Ár sportshy Olımpıadaǵa barýdy armandaıdy. Sol úshin bar ómirin osy bıik maqsatqa baǵyndyryp, tynbaı jattyǵady. Solardyń biri – dzıýdodan Qazaqstan ulttyq quramasynyń múshesi Nursultan Zaızaǵalıev. Sportshy Kazinform tilshisiniń saýaldaryna jaýap berdi. 

– Nursultan, jasóspirimder arasynda kóptegen halyqaralyq jarysta júldeli boldyń. Búginde eresekterge ótip qana qoımaı, ulttyq quramanyń sportshysy atandyń. Bul týraly ne aıtar edińiz?  

– Iá, jasóspirimder jáne jastar arasynda halyqaralyq dodalarda el namysyn abyroımen qorǵadym. 2018 jyly Pavlodarda Qazaqstan chempıonatynda jeńimpaz atanǵannan keıin jolym ashyldy. Makaýda Azııa, Antalııada Eýropa kýboginde úzdik úshtikke iliktim. 2022 jyly Grekııada Eýropa kýboginde úshinshi, Polshada ekinshi orynǵa ıe bolsam, Aýstrııada chempıon atandym. Sol jyly Azııa birinshiliginiń kúmis júldesine qol jetkizdim. Bıyl Germanııadaǵy Eýropa kýbogynda eń bıik jeńis tuǵyrynan kórindim. Degenmen álem chempıonattaryna qatysqanymmen, jolym bolmady. Demek, áli de tynbaı jattyǵyp, sheberligimdi jetildire túsýim kerek.

Eresekter qataryna qosylǵanyma da kóp bola qoıǵan joq. Soǵan qaramastan, 2023 jylǵy Qazaqstan chempıonatynda 66 kelige deıingi salmaqta fınalǵa deıin qınalmaı jettim. Sheshýshi básekede ǵana menen 11 jas úlken, sambodan álem chempıony, dzıýdodan Gran-prı jarysynyń júldegeri, aqtóbelik Eset Qýanovqa ese jiberdim. Tájirıbeniń arqasy tájirıbe ǵoı. Keı tustarda onyń da kóp sheshýshi ról atqaratynyn ózińiz de jaqsy bilesiz. Aldaǵy ýaqytta jolymyz áli túıisedi dep oılaımyn. Sol kezde ese qaıyrar sát te keler. 

Shúkir, búginde joǵaryda atap ótken jetistikterimniń, tynbaı eńbektenýdiń nátıjesinde Qazaqstan ulttyq quramasynyń sapyna alyndym. Endigi maqsat – ulttyq qurama múshesi retinde Olımpıadaǵa upaı beretin úlken jarystarǵa qatysyp, júlde alý.

– Sporttyq mansabyńdaǵy bapkerleriń týraly da bilgimiz keledi...

– Ár sportshynyń artynda myqty jattyqtyrýshy turady. Ol shákirtin baptap qana qoımaı, ekinshi ákesi retinde qamqor bolyp, bar bilgenin úıretedi. Birlesken jumys istelse, nátıje de bolady. Sportshynyń ózi de eńbekqor bolýy tıis.

Bapkerlerim jóninde aıtsam, Syrym aýdanynda alǵashqy jattyqtyrýshym Ásker Nurmuhanov boldy. Sol kisimen kelisip, Oraldaǵy sportqa daryndy balalarǵa arnalǵan mamandandyrylǵan oblystyq mektep-ınternatyna qabyldandym. Ol jerde bapkerim, marqum Narıman Bekqalıev aǵaıymnan kóp nárse úırendim. Ákemdeı boldy desem, artyq aıtqanym emes.

Oraldan keıin Almaty qalasyndaǵy respýblıkalyq sport kolledjinde bilim aldym. Sodan bastap Ábet Nurjannyń qolastynda jattyǵyp, shyńdalý ústindemin.

BQO dzıýdo federatsııasynyń prezıdenti Rýstam Shaıhıev aǵamyzǵa da aıtar alǵysym kóp. Ol kisi aqylyn aıtyp, joq jerlerimizdi jamap, kómegin jasaýdan jalyqqan emes. Jýyrda Batys Qazaqstan oblysynyń jyl qorytyndysynda ózim «Sporttyq minez úshin» atalymymen marapattalsam, dzıýdo federatsııasynyń «Úzdik sporttyq federatsııa» atanýy teginnen-tegin emes. Qazirgi tańda ál-Farabı atyndaǵy Qazaq ulttyq ýnıversıtetiniń 1-kýrsynda oqyp jatyrmyn.

– Parıj Olımpıadasyna joldama alýǵa múmkindigiń bar ma?

– Múmkindik mende óte kóp. Alla qalasa, aldaǵy qańtar aıynda Portýgalııada Gran-prı jarysy ótedi. Ulttyq qurama jattyqtyrýshylary aqyldasyp, meni sol jarysqa qosty. 4 qańtarda Shymkent qalasynda doda aldyndaǵy oqý-jattyǵý jıyny bastalady. Jarty aı sol jerde daıyndalamyz. Sosyn 26 qańtarda Portýgalııaǵa jol tartamyz. Buıyrsa, sol týrnırde Olımpıadaǵa upaı úlestiriledi. Soǵan qol jetkizý úshin aıanbaı, barymdy salamyn.

– Nursultan, aldaǵy arman-maqsattaryń qandaı?

– Ár sportshynyń armany – álem chempıonaty, olımpıadada óner kórsetip, bıik shyńnan kóriný ǵoı. Meniń de armanym sol. Týymyzdy kókke kóterip, úıde tileýimdi tilep otyrǵan anam Shynardy qýantsam deımin. Anam men saparǵa shyqqan saıyn alańdap, taqymyn qysyp otyrady. Sony oılap, ózime-ózim jiger, rýh beremin. Sondyqtan álemdik deńgeıdegi jarystardan jeńispen oralǵannan basqa maqsat ázirge joq mende.

– Endeshe, jeńis tileımiz. Sáttilik árdaıym joldas bolsyn!

Eske sala keteıik, budan buryn álem chempıony Marııa Brovkovanyń BQO-nyń úzdik sportshysy atanǵanyn jazǵan edik.