«Olımpıadadan keıin ishimdikke táýeldi bola bastadym»: Danııar Eleýsinov qıyndyqqa tap bolǵanyn aıtty
ASTANA. KAZINFORM – Olımpıada chempıony Danııar Eleýsinov ózine qatysty synǵa jaýap berip, Olımpıadadan keıin ishimdikke táýeldi bola bastaǵanyn ashyq aıtty.
Sportshy bul jaǵdaıdy ómirindegi synaq retinde qabyldaıtynyn jáne kúresip jatqanyn málimdedi.
– Bári meni synap jatyr ǵoı. «Kezinde jol apatyna ushyradyń, mas kúıde boldyń» dep. Iá, men moıyndaımyn. Mende Olımpıadadan keıin alkogolge, alkogolızmge jaqyndyǵym, áýestigim bar. Ol kúletin nárse emes. Biraq adamdar qazir kúledi. Óziniń basyna kelmegennen keıin túsinbeıdi. Kezinde men de kúlgenmin, jas kezimde túsinbeıtinmin. Abaılańyzdar, qazir bul máselemen kúresip jatyrmyn, – dedi Danııar Eleýsinov Instagram paraqshasynda.
Onyń aıtýynsha, adamnyń basyna túsken qıyndyqty syrttan baǵalaý ońaı. Sportshy ár adamnyń ómirinde ártúrli synaq bolatynyn atap ótti.
– Men álem chempıony, Azııa oıyndaryn bárin utýym kerek bolǵan adammyn. Biraq mende osy synaq, basqa adamdarda basqasha synaq. Álem chempıony bolmaı, biraq basqa jaǵynan myqty bolady. Sol sııaqty ǵoı. Ómir ǵoı. Ózderińizdiń basyńyzǵa kelmeı synaı bermeńizder, – dedi ol.
Eske sala keteıik, buǵan deıin Danııar Eleýsinovtyń Astanada ustalǵany týraly jazǵan edik.
