Olımpıadadan bólek, ǵylymı joba jeńimpazdaryna da syıaqy beriledi — Prezıdent
ASTANA. KAZINFORM — Halyqaralyq olımpıadalarda top jarǵan daryndy oqýshylardy yntalandyrýmen qatar, ǵylymı jobalar baıqaýynda jeńiske jetken balalarǵa da aqshalaı syıaqy beriledi. Memleket basshysy Qasym-Jomart Toqaev bıyl daryndy jastardy qosymsha qoldaý sharalaryn qolǵa alýdy tapsyrdy.
Prezıdenttiń aıtýynsha, jańa tsıfrlyq dáýirge qadam basqan tusta adamı kapıtal damýdyń asa mańyzdy faktoryna aınalyp otyr. Ári bul — Qazaqstannyń artyqshylyǵy.
— Balalarymyz — talantty. Álemde joǵary básekege qabiletti ekenin kórsetip júr. Birer kún buryn Aqordaǵa laıyqty marapattaryn alý úshin halyqaralyq zııatkerlik olımpıada jeńimpazdary arnaıy keldi. Osy oqý jylynda daryndy balalardy qosymsha yntalandyrý sharalaryn qabyldaýdy tapsyrdym. Olımpıadadaǵy tabystaryna ǵana emes, ǵylymı jobalar baıqaýyndaǵy jeńisteri úshin de aqshalaı syıaqy beriledi, — dedi Qasym-Jomart Toqaev.
Onyń aıtýynsha, ozyq tehnologııalar men jastardyń zııatkerlik áleýeti úılesim taýyp, qazirdiń ózinde eleýli ekonomıkalyq nátıje berip otyr.
— Jańa startaptar ashylyp, alǵashqy «syńarmúıiz startaptar» paıda boldy. Osy tájirıbeni keńeıtý úshin bilim berýdi basty orynǵa qoıatyn ınnovatsııalyq ekojúıe qurý qajet. Sol sebepti Tsıfrlandyrý jáne jasandy ıntellekt jyly aıasynda salany basqarýdyń platformalyq úlgisine kóshý bastaldy, — dedi Memleket basshysy.
Buǵan deıin Qasym-Jomart Toqaev áleýmettik jelide bilim berý salasyna qatysty negizsiz daý-damaı men aıqaı-shýdyń kóbeıgenin synaǵan edi.
Sonymen birge, Prezıdent tarıhı ańyzdardyń ornyna progreske baǵyttalǵan pánderdi oqytý qajettigin aıtýda.
