Olımpıadadan 23 medal jeńip alǵan qazaq oqýshylary 4,5 mln teńgege deıin syıaqy alady
Oqý-aǵartý mınıstrliginiń málimetinshe, matematıkadan halyqaralyq olımpıadada (IMO) Qazaqstan quramasy 3 kúmis jáne 3 qola medal jeńip alǵan.
Komandamyz 174 upaı jınap, elimizdiń olımpıadaǵa qatysý tarıhyndaǵy jańa rekordyn ornatty. Bul sońǵy 12 jyldaǵy úzdik nátıje boldy.
Fızıkadan halyqaralyq olımpıadada oqýshylarymyz 1 altyn, 4 kúmis medalǵa ıe boldy.
Bul - sońǵy 8 jyldaǵy eń jaqsy kórsetkish. Byltyr ulttyq qurama qorjynyna 5 kúmis medal túsken bolatyn.
Geografııadan ótken halyqaralyq olımpıadada oqýshylarymyz ekinshi jyl qatarynan altyn medal jeńip aldy. Bıyl da 1 qola medalǵa ıe boldyq.
Bıologııadan halyqaralyq olımpıadaǵa qatysýshylar 3 kúmis jáne 1 qola jeńip alyp, byltyrǵy nátıjelerin jaqsartty.
Ótken jyly 1 kúmis jáne 2 qola medal, sondaı-aq 1 qurmet gramotasyn jeńip alǵan bolatyn.
Zııatkerlik saıysqa qatysqan jas hımıkterimizdiń de joǵary deńgeıde óner kórsetti. Olar 1 altyn jáne 3 kúmis jeńip aldy.
Onyń ústine bul 2017 jyldan bergi alǵashqy altyn boldy.
Sonymen qatar qazaqstandyq oqýshylar lıngvıstıkadan halyqaralyq olımpıadada alǵash ret 2 qola medal jeńip aldy.
«Aldaǵy ýaqytta ınformatıkadan halyqaralyq olımpıada ótedi. Men oqýshylarymyzdyń halyqaralyq olımpıadada el namysyn abyroımen qorǵaıtynyna senimim mol. Olımpıadaǵa qatysýshylar men júldegerlerge qajyrly eńbegi, kúsh-jigeri men tabandylyǵy úshin alǵys aıtamyn. Kúndelikti jumysy jáne joǵary kásibıligi úshin áriptesterime de rahmet aıtqym keledi. Bıyl Prezıdenttiń qoldaýynyń arqasynda alǵash ret oqýshylarymyz 4,5 mln teńgege deıin qomaqty aqshalaı syıaqyǵa jáne UBT-dan ótpeı-aq qazaqstandyq joǵary oqý oryndarynda oqý úshin grantqa ıe bolady. Altyn medal alǵan oqýshyǵa 1 500 AEK, kúmis medalǵa 1 000 AEK, qola medalǵa 500 AEK kóleminde aqshalaı syılyq beriledi. Oqýshylardy jarysqa daıyndaǵan ustazdar da birjolǵy syıaqy alady» , - dedi Oqý-aǵartý mınıstri Ashat Aımaǵambetov.
