Olımpıadadaǵy boksshylar sátsizdigine pandemııa áser etti - Qazaqstan boks federatsııasy

NUR-SULTAN. QazAqparat – Qazaqstan boks federatsııasynyń atqarýshy dırektory Myqtybek Maratbek Ortalyq kommýnıkatsııalar qyzmetinde qazaqstandyq boksshylardyń Olımpıadadaǵy sátsizdigine ne áser etkenin aıtty, dep habarlaıdy QazAqparat tilshisi.

«Ózderińiz bilesizder, olımpıadalyq jarystardy boksshylarymyz sátsiz bastady. Olardyń daıyndalýy úshin Sport mınıstrligi men Ulttyq Olımpıada komıteti tarapynan materıaldyq jaǵynan, jabdyq jaǵynan bári jasaldy. Ókinishke qaraı, pandemııa óz áserin tıgizýde. Sportshylar úıde oqshaýlaýda otyrdy, jabyq bazalarda daıyndaldy. Shetelderge shyqqanda jarysqa deıin 4-5 kún karantınde otyrǵan kezderi boldy. Bul áserin tıgizbeı qoımady dep oılaımyn. Sondyqtan, olardy synaı berýge de bolmaıdy. Áli de bolsa, ekinshi top sportshylarymyz oıyn kórsetedi, solardan jaqsy nátıjeler kútemiz», - dedi Marat Myqtybek Ortalyq kommýnıkatsııalar qyzmetinde ótken brıfıngte.

Aıta keteıik, Tokıodaǵy Olımpıadada Qazaqstan quramasynda sporttyń 28 túrinen 97 joldama bolǵan edi. Ázirge Qazaqstan qorjynynda úsh «qola» medal bar. Olardy dzıýdoshy Eldos Smetov jáne aýyr atletter Igor Son men Zúlfııa Chınshanlo jeńip aldy.

«Almaty» olımpıadalyq daıarlaý ortalyǵy dırektorynyń orynbasary, AIBA Halyqaralyq federatsııasy komıssııasynyń múshesi Ermahan Ybyraıymov Tokıo Olımpıadasyn jeńilgen boksshylarymyzdyń oıynyna taldaý jasady. Onyń aıtýynsha, Vasılıı Levıttiń jeńilýine tóreshi kináli, al Abylaıhan Júsipov pen Bekzat Nurdáýletov jaýapkershilikti kótere almady.

Sonymen birge, Sport jáne dene shynyqtyrý isteri komıtetiniń tóraǵasy Serik Sápıev Olımpıadada qalǵan tórt boksshynyń tórteýi de medal ákelýi múmkin degen boljam jasady.