Olımpıadada top jarǵan qazaq balýany AQSh-ta belgisiz jaǵdaıda kóz jumdy
ASTANA. KAZINFORM — 2014 jyly Jasóspirimder arasyndaǵy ekinshi jazǵy olımpıada oıyndarynda chempıon atanǵan qazaqstandyq erkin kúres balýany Muhambet Qýatbek 27 jasynda AQSh-ta belgisiz jaǵdaıda dúnıeden ótti.
27 jastaǵy sportshy jasóspirimder arasynda bıik belesterdi baǵyndyryp úlgergen bolatyn. Ol 2014 jyly Nankınde ótken jasóspirimder Olımpıadasynda top jaryp, keıin jasóspirimder arasynda Azııa chempıony, álem chempıonatynyń qola júldegeri atanǵan.
Al sońǵy jyldary Muhambet Amerıkada turǵan.
Tanymal sportshynyń qazasy týraly belgili sport jýrnalısi Danııar Kárimjan málimdedi.
«Muhambet balýan 16 naýryz kúni AQSh-ta kóz jumdy. Ol sońǵy eki jylda Fıladelfııada turǵan. Onyń neden qaıtys bolǵany belgisiz. Qazirgi tańda balýannyń denesin elge ákelý máselesimen elshilik aınalysyp jatyr», — dedi jýrnalıst Danııar Kárimjan.
Artynsha bul qaraly habardy Qazaqstan kúres federatsııasynyń baspasóz hatshysy Aspandııar Esenjolov ta resmı túrde rastady.
«Ókinishke qaraı, osyndaı habar alyp otyrmyz. Táýelsiz Qazaqstan tarıhynda erkin kúresten jasóspirimder Olımpıadasynda top jarǵan balýanymyz Muhambet Qýatbek ómirden ótti. Týystary men ata-anasyna qaıǵyra kóńil aıtamyz. 27 jastaǵy balýan sońǵy jyldary AQSh-ta ómir súrdi», — dedi Esenjolov.
