Olımpıadada otandyq sportshylardy qoldaıtyn bapkerler men dárigerler sany rekordtyq kórsetkishke jetti
ASTANA. KAZINFORM – Parıj-2024 (Frantsııa) Olımpıadasynda Qazaqstan komandasyna 67 bapker men quramyna dárigerler, massajshylar jáne psıhologtar enetin keshendi ǵylymı toptyń 15 múshesi qoldaý kórsetedi.
Komandany súıemeldeıtin tulǵalardyń sany alǵash ret qatysýshylar sanynan artyp otyr. Qosymsha akkredıtatsııalardy qaıta josparlaý kezinde sportshylardyń sátti óner kórsetýine tikeleı áser etetin kásibı mamandar - bapkerler quramy men sporttyq dárigerlerge basymdyq berildi.
«Olımpıada oıyndaryna qatysqan Qazaqstan quramasy tarıhynda bapkerler men dárigerler sany sportshylar sanynan asyp túsken emes. Súıemeldeýshi tulǵalardyń akkredıtatsııasy tek qana Olımpıada oıyndaryna qatysatyn atletterdiń sanyna baılanysty bólingen bolatyn. Alaıda, Oıyndy uıymdastyrý komıtetiniń jańarǵan sanaý júıesi, sondaı-aq, UOK pen Qazaqstan týrızm jáne sport Mınıstrliginiń birlesken is-áreketteriniń arqasynda barlyq sportshynyń jeke jattyqtyrýshysyn júıege engizý múmkindigi paıda boldy. Endi sportshylardyń jeke bapkerleri de ulttyq quramanyń bas bapkerlerimen birge jarysqa qatysa alady. Qaıtalap aıtamyn, buryn-sońdy mundaı bolǵan emes. Tipti, keıbir Olımpıada oıyndaryna Parıjden áldeqaıda kóp atlet qatyssa da, mundaı jaǵdaı tirkelmegen.
Odan bólek, ulttyq quramanyń úzdik sportshylary Eldos Smetov (dzıýdo) pen Nursultan Tursynovtyń (grek-rım kúresi) jeke bapkerleri alǵashqy keńeıtilgen tizimge enbeı qalǵanyn da aıtý kerek. UOK-tiń Parıj-2024 Oıyndaryn uıymdastyrý komıteti jáne HOK-pen júrgizgen uzaq kelissózderiniń arqasynda atalǵan jattyqtyrýshylardy akkredıtatsııadan ótkizýge kelisim berildi. Al atletter úshin jeke bapkerlerin almastyratyn eshkim joq ekenin umytpaý kerek.
Olımpıada kezinde Oıyndy uıymdastyrý komıtetimen aradaǵy barlyq qarym-qatynas tikeleı UOK arqyly órbıdi jáne meniń áriptesterim buǵan tas-túıin daıyn. Parıj oıyndarynda ulttyq quramanyń jumysyn úılestirýge UOK-tyń jeti qyzmetkeri jumyldyrylǵan jáne olardyń árqaısysynda ózindik jaýapkershilik aımaǵy bar. Olar tehnıkalyq jáne logıstıkalyq kómek kórsetý, jattyǵý kestesi men tasymaldaýdy retteý, jarysqa tirkeý jáne taǵy da basqa kóptegen jumysty atqarý arqyly sporttyq delegatsııaǵa jaıly jaǵdaı jasaıdy. Qyzmetkerler táýlik boıy uıymdastyrý komıteti jáne HOK ókilderimen tikeleı baılanys ustap otyr. Kez kelgen sportshy men kez kelgen delegatsııa ókilinde bizdiń mamandar sheshetin shuǵyl máseleler týyndaýy múmkin», - deıdi olımpıadalyq aýylǵa jaýapty Qazaqstan UOK sport departamentiniń basshysy Bektur Qııatbaı.
Aıta ketelik, UOK basshylyǵy Olımpıada oıyndaryna Halyqaralyq Olımpıada komıtetiniń shaqyrýymen keldi jáne jarystan bólek, HOK, AOK, halyqaralyq federatsııalar, sondaı-aq, ózge elderdegi UOK ókilderimen ekijaqty kezdesýler ótkizý josparlanǵan. Qazirgi tańda 35-ten asa kezdesý josparlanyp qoıdy.
Sonymen qatar, delegatsııa quramyna 16 sparrıng-seriktestiń engenin aıta ketý kerek. Olar jekelegen sport túrleri boıynsha synǵa túsetin atletterimizge olımpıadalyq jarys ótetin aımaqtarda kómektesetin bolady.
2024 jylǵy Olımpıada oıyndaryna 25 sport túrinen 80 qazaqstandyq atlet irikteýden ótti.
