Olımpıadada grek-rım men erkin kúresten Qazaqstan namysyn kimder qorǵaıdy
Bıyl XXXII jazǵy Olımpıadada erkin kúres 1-7 tamyz, grek-rım kúresinen básekeler 1-4 tamyz aralyǵynda ótedi. Erkin kúresten erler alty, áıelder alty salmaqta, grek-rım kúresinen 6 salmaqta tek erler arasyndaǵy myqty sportshyny anyqtaıdy. Jalpy 18 júlde jıyntyǵy sarapqa salynady.
Tokıo Olımpıadasynda erkin kúres pen grek-rım dodasyn 1989 jyly 9 qazanda ashylǵan «Makýharı Messe» konferents-ortalyǵy qabyldaıdy. Sonymen qatar bul keshende taekvondo (A zaly) men semserlesý (V zaly) sportynan da dodalar ótedi. Túrli kezdesý men kórme ótkizýge arnalǵan nysan trıbýnasyna 6 myńnan 8 myńǵa deıin jankúıer sııady.
Grek-rım kúresi
Grek-rım kúresi 1986 jyly Afınada ótken alǵashqy olımpııa oıyndarynan bastap 2016 jylǵa deıingi aralyqta tek erler arasynda 27 ret ótipti. Bıyl Japonııa astanasynda erler ǵana baq synaıdy. Osy aralyqta qatysqan 101 memlekettiń 47-sinde júlde bar. Jalpy 2649 atlet 601 medaldi (193 altyn, 195 kúmis, 213 qola) sarapqa salǵan.
Júlde boıynsha kósh basynda turǵan quramalar:
1. KSRO – 60 (34 altyn, 16 kúmis, 10 qola);
2. Shvetsııa – 58 (20+17+21);
3. Fınlıandııa – 58 (18+21+19);
4. Majarstan – 39 (16+12+11);
5. Reseı – 26 (12+7+7);
...
31. Qazaqstan – 6 (1+1+4);
Erkin kúres
Erkin kúres alǵash ret Olımpıada baǵdarlamasyna 1904 jyly AQSh-tyń Sent-Lýıs qalasynda qosylǵan. Al áıelder arasynda 2004 jyldan bastap ótkizilip keledi. Tokıoda 27-shi ret bul sport túrinen tórt jyldyq basty dodasynda atletter jarys kórkin qyzdyrady. Osy ýaqytqa deıin jalpy 120 memlekettiń bozkilem sheberi baq synap, 52 el júldege ıe bolǵan.
Júlde boıynsha kósh basynda turǵan elder:
1. AQSh quramasy – 113 medal (49 altyn, 36 kúmis, 28 qola)
2. KSRO – 56 (28+15+13)* qazir Reseı quramasynyń nátıjesi bólek esepteledi
3. Japonııa – 56 (28+14+14)
4. Túrkııa – 39 (18+12+9)
5. Reseı – 34 (17+9+8)
...
30. Qazaqstan – 11 (4 kúmis, 7 qola);
Barlyǵy 2 926 sportshy qatysyp, 683 júlde jıyntyǵy sarapqa salynǵan (216 altyn men kúmis, 251 qola).
Erkin kúresten 2019 jylǵy Álem chempıonatynyń qorytyndysy boıynsha olımpıada joldamasyn ıelengen sportshylar:
1. Nurıslam Sanaev (2014 jylǵa deıingi esimi – Artas Sanaa) 1991 jyly 9 aqpanda Reseı Federatsııasy, Týva Respýblıkasynyń Chadan qalasynda dúnıege kelgen. Qazir Aqtóbe oblysynyń atynan 57 kılogramda óner kórsetetin sportshynyń úzdik nátıjeleri: Azııa chempıonatynyń qola júldegeri (2017), Azııa chempıony (2018), Álem chempıonatynyń kúmis júldegeri (2018), Álem chempıonatynyń qola júldegeri (2019).
2. Dáýlet Nııazbekov 1989 jyly 12 aqpanda Qyzylorda oblysy Jańaqorǵan aýdanynda dúnıege kelgen. 65 kılogramm salmaqta beldesetin sportshynyń úzdik nátıjeleri: Álem chempıonatynyń qola júldegeri (2011), eki dúrkin Azııa chempıonatynyń qola júldegeri (2017, 2019), Álem chempıonatynyń kúmis júldegeri (2019).
3. Danııar Qaısanov 1993 jyly 18 shildede Shyǵys Qazaqstan oblysynda dúnıege kelgen. 74 kılogramm salmaqta kúsh synasatyn sportshynyń úzdik nátıjeleri: Azııa oıyndarynyń kúmis júldegeri (2018), eki dúrkin Azııa chempıony (2019, 2020), Álem chempıonatynyń qola júldegeri (2019)
4. Álisher Erǵalı 1999 jyly 12 sáýirde Jambyl oblysynda dúnıege kelgen. 97 kılogramm salmaqta el namysyn qorǵaıtyn balýannyń úzdik nátıjeleri: Azııa chempıonatynyń qola júldegeri (2019, 2020), 2019 jyly ótken Álem chempıonatynda 5-shi orynǵa turaqtaǵan.
5.Valentına Islamova 1992 jyly 18 naýryzda dúnıege kelgen. 2018 jyly Qazaqstan azamattyǵyn alǵan, 50 kılogramǵa deıingi salmaqta baq synaıtyn sportshynyń úzdik nátıjeleri: Azııa chempıonatynyń qol júldegeri (2019, 2020), Álem chempıonatynyń qol júldegeri (2019).
6.Elmıra Syzdyqova 1992 jyly 5 aqpanda Qaraǵandy oblysynda dúnıege kelgen. 76 kılogramǵa deıingi salmaqta beldesetin sportshynyń úzdik nátıjeleri: Azııa chempıonatynyń qola júldegeri (2014, 2018, 2020), Azııa chempıonatynyń kúmis júldegeri (2015, 2016), Olımpıada (2016) men Azııa oıyndarynyń (2018) qola júldegeri.
Grek-rım kúresinen 2019 jyly ótken Álem chempıonatynyń qorytyndysy boıynsha olımpııa oıyndaryna joldama alǵan sportshylar:
1.Meırambek Aınaǵulov 1994 jyly 17 aqpanda Aqtóbe oblysynda dúnıege kelgen. 60 kılogramda kúsh synasatyn atlettiń úzdik nátıjeleri: Azııa chempıonatynyń qola júldegeri (2016, 2018), Álem chempıonatynyń kúmis júldegeri (2017), Azııa chempıony (2018), Azııa oıyndarynyń qola júldegeri (2018), Álem chempıonatynyń qola júldegeri (2019).
2. Ashat Dilmuhamedov 1986 jyly 26 shildede Almaty oblysynda dúnıege kelgen. 77 kılogramda óner kórsetedi. Úzdik nátıjeler: Azııa chempıonatynyń qola júldegeri (2011, 2016), Azııa chempıony (2018). Sonymen qatar 2019 jyly ótken Álem chempıonatynda 5-shi oryn alǵan.
