Olımpıadada el úmitin aqtaýǵa kúsh salamyz – Marııa Brovkova
ORAL. KAZINFORM – Batysqazaqstandyq eskek esý sheberi, jasóspirimder arasynda eki dúrkin álem chempıony Marııa Brovkova óziniń sporttyq jolynda alǵash ret olımpıadaǵa qatysqaly otyr. Sportshy tórt jylda bir keletin aıtýly dodaǵa daıyndyq barysy jóninde áńgimelep berdi.
- Marııa, áýeli osy kezge deıin qol jetkizgen basty tabystaryńa toqtalyp ótseń?
- Aldymen jasóspirimder arasynda 2022 jáne 2023 jyldary álem birinshiliginde úzdik shyqqanymdy aıta ketkim keledi. Sondaı-aq 2023 jyly álem kýboginde top jaryp, Azııa oıyndarynyń júldegeri atandym. Bıyl Azııa chempıony bolyp, seriktesim Rýfına Iskakovamen birge Parıj olımpıadasyna joldama aldyq. Buıyrsa, 200 metr qashyqtyqta bir adamdyq kanoeda jáne 500 metrde Rýfınamen birge baq synamaqshymyn.
- Munyń bári – kóp jylǵy jattyǵýdyń jemisi ǵoı, solaı ma?
- Árıne, tabystar ońaılyqpen kelgen joq. Týǵan jerim – Oral qalasynda oblystyq olımpıadalyq rezervtegi mamandandyrylǵan mektep-ınternat kolledjinde bes jyl boıy oqyp, jattyqtym. Sodan keıin Qazaqstan ulttyq quramasyna alyndym. Oralda anam Elena Evgenevna Brovkova jáne ınternattaǵy ekinshi bapker Natalıa Nıkolaevna Sokolova baptady. Qazirgi kezde ulttyq qurama bapkeri Sergeı Nıkolaevıch Tıýnovtyń qol astynda jattyǵýdamyn. Ol kisi tózimdilik pen kásibı sheberlikke baýlyp, meniń daıyndyǵyma kóp kúsh jumsaýda.
- Daıyndyq demekshi, olımpıadaǵa qalaı ázirlenip jatyrsyzdar?
- Qazir biz ulttyq quramamen birge Polshada sheberligimizdi ushtaýdamyz. Olımpıada qarsańynda 23 jasqa deıingi jastar arasynda Bolgarııanyń Plovdıv qalasynda 17-21 shilde aralyǵynda álem chempıonaty ótedi. Ol jarys ta ońaı bolmaıtyny anyq. Sodan keıin Polshaǵa qaıta oralyp, tamyz aıynyń basynda Frantsııaǵa attanamyz. Kanoe men baıdarkadan jarystar 6-10 tamyz aralyǵyna josparlanǵan.
Árıne, ázirlik óte qaýyrt júrgizilýde, júıkege de salmaq túsedi. Degenmen biz bárine de tótep berip, tórtjyldyqtyń basty dodasynda el namysyn abyroımen qorǵaımyz dep senemiz.
- Olımpıadadan keıin de jarystar bar shyǵar?
- Iá, olımpıadadan keıin maýsym aıaqtalmaıdy. Ózbekstannyń Samarqan qalasynda olımpıadalyq emes qashyqtyqtar boıynsha eresekter arasynda álem chempıonaty ótedi. Onda da synǵa túsemiz. Sodan keıin 1,5 aı demalyp, jańa maýsymǵa daıyndalamyz. Aldaǵy maqsatymnyń biri – kelesi jyly eresekter arasynda álem chempıonatynda júldege iliný.
- Marııa, áńgimeńe rahmet. Olımpıadada tabys tileımiz.
Eske sala keteıik, budan buryn álem chempıony Marııa Brovkovanyń BQO-nyń úzdik sportshysy atanǵanyn jazǵan bolatynbyz.
