Olımpıada júldegerlerin daıyndaǵan qaraǵandylyq pedagogtarǵa syıaqy beriledi
ASTANA. QazAqparat - Qaraǵandy oblysynda jańa oqý jylynan bastap respýblıkalyq jarystar men olımpıadalar jeńimpazdaryn, júldegerlerin daıyndaǵan muǵalimder aqshalaı syıaqymen yntalandyrylatyn bolady. Bul týraly bilim qyzmetkerleriniń dástúrli tamyz konferentsııasy barysynda belgili boldy, dep habarlaıdy QazAqparat aımaq basshysynyń baspasóz qyzmetine silteme jasap.
«Bizde ustaz bedelin, muǵalimderdiń shyǵarmashylyq jumysqa degen yntasyn kóterýge baǵyttalǵan birqatar usynystar bar. Birinshiden, respýblıkalyq, halyqaralyq deńgeıdegi olımpıadalar men jarystardyń jeńimpazdary men júldegerlerin daıyndaǵan pedagogtarǵa grant taǵaıyndaý. Ekinshiden,muǵalimder arasynda olımpıada ótkizý. Marapattaý nátıjesinde 30 jeńimpaz bir aıǵa shetelge tájirıbe almasýǵa jiberiledi», - dedi oblystyq bilim basqarmasynyń bastyǵy Asqat Aımaǵambetov.
Oblys ákimi Erlan Qoshanov bul bastamany qoldady. Biraq, konferentsııada syıaqy mólsheri naqtylanbady.
Sondaı-aq shara barysynda aımaq basshysy qalalar men aýdan ákimderine jas ustazdardy qoldaý baǵdarlamasyn jasaýdy tapsyrdy. Árbir maman áleýmettik paketpen qamtamasyz etilýi tıis. Sonymen birge, oblysta pedagog mamandardyń elektrondy bırjasy qurylatyn bolady. Óńirde matematıka, fızıka, hımııa jáne bıologııa pánderiniń muǵalimderi jetispeıdi.
«Elektrondy bırja bos jumys oryndaryn ýaqytyly toltyrýǵa jáne qajettilikti boljap otyrýǵa múmkindik beredi. Biryńǵaı bos jumys oryndary men jumys izdeýshi pedagogtar bazasy qalyptasatyn bolady. Bul mektep dırektorlaryna neǵurlym mamandanǵan pedagog kadrlaryn tańdaýǵa múmkindik beredi. Jáne eń bastysy - elektrondy bazanyń qurylýy jumysqa qabyldaýdyń ashyqtyǵyn qamtamasyz etedi»,- dedi Asqat Aımaǵambetov.
