Olımpıada júldegerleri balalardy Jańa jyl merekesimen quttyqtaýda
ASTANA. QazAqparat - 27-29 jeltoqsan aralyǵynda Serik Sápıev atyndaǵy Boksty damytý ortalyǵynda Qaraǵandy oblysyndaǵy balalar úıleri men az qamtylǵan otbasylarda tárbıelenip jatqan, sondaı-aq múmkindigi shekteýli balalarǵa arnalǵan jańajyldyq shyrsha merekeleri ótedi.
Bul týraly QazAqparatqa QR aýyr atletıka federatsııasynan habarlandy.
Aıaz Ata, Aqshaqar jáne basqa da Jańa jyl keıipkerlerimen birge balalardy aýyr atletıkadan Olımpıada chempıony Nıjan Rahımov pen Rıo Olımpıadasynyń qola júldegeri Karına Gorıcheva quttyqtaýǵa keldi.
Dástúrge aınalǵan merekelik sharalarǵa 1-14 jas aralyǵyndaǵy myńnan astam bala qatysatyny josparlanýda. Uıymdastyrýshylar balalarǵa syılyqtan basqa, kóńildi baǵdarlamalar, ınteraktıvtik oıyndar, sondaı-aq keremet merekelik túski as ázirledi.
«Mundaı sharaǵa alǵash qatysýym jáne bul sońǵysy emes dep oılaımyn. Merekege qatysyp, oǵan tamshydaı bolsa da úlesimdi qosqanym úshin óte qýanyshtymyn! Balalardyń jarqyn kúlkisi men bal-bul janǵan kózderin kórýden artyq ne bar!», - deıdi Nıjat Rahımov.
Serik Sápıev atyndaǵy Boksty damytý ortalyǵynda úsh kúnniń ishinde «Úmit úıi», «Preobrajenıe», «Shapaǵat», «Qulynshaq», «Ásem», «Tańsholpan», «SOS Temirtaý», «Aınalaıyn», oblystyq OBT balalar úılerinen, sonymen qatar «Arman», «Úmit», «Lýchık nadejdy» múgedekter qoǵamdarynan, Múgedek balalarǵa arnalǵan mektep-ınternattan, Temirtaý KBO-dan, Tirek-qozǵalys apparaty buzylǵan balalar mektebinen baldyrǵandar bolady.
