Olımpıada júldegeriniń qazasy: Shymkenttikter Muz saraıynyń aldynda jınaldy
Muz saraıynyń aldyna jınalǵan jurtshylyq Sochı Olımpıadasynyń qola júldegeri Denıstiń týǵan-týysqandaryna kóńil aıtyp, qaıǵylaryna ortaqtastyǵyn bildirdi.
Adamdar esimi álemge tanylǵan Denıstiń mezgilsiz ólimi ońtústik jurtshylyǵynyń da qabyrǵasyn qaıystyrǵanyn atap ótti. Qamshynyń sabyndaı ǵana qysqa ǵumyrynda juldyzdaı jarq etip, nebári 25 jasynda jaryq dúnıemen qosh aıtysqan sportshynyń jetistikterin atap ótti.
Shymkenttik mánerlep syrǵanaý sportshylary bolsa onymen birge bolǵan, áńgimelesken sátterdi eske aldy. Onyń ósip kele jatqan jas sportshylarǵa úlgi bolǵany aıtyldy.
Qala turǵyndary eriksiz kózderine jas alyp, onyń jarqyldaǵan beınesi máńgi este qalatynyn bildirdi.
Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy Baıseıitova kósheleriniń qıylysynda 19 shildede túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.
Adam óltirý babymen qylmystyq is qozǵaldy.
Búgin belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.
25 jasynda ómiri úzilgen sportshymen qoshtasý rásimi 21 shilde kúni Almatydaǵy Balýan Sholaq atyndaǵy sport saraıynda ótedi. Bastalýy - saǵat 10:00-de.
