Olımpıada júldegeri Sáken Bıbosynovty jerlesteri qoshemetpen kútip alyp, kólik mingizdi
Tokıo tórinde ótken dodada álemniń eń úzdik boksshylarymen taıtalasyp, Alashtyń mereıin asyrǵan jerlesimizdi oblys ákimi Ómirzaq Shókeev, Túrkistan jastary, sportshynyń áriptesteri, týǵan-týystary men dostary qarsy aldy. Qazaqstannyń abyroıyn asqaqtatqan boksshyǵa Túrkistan oblysynyń kásipkerleri temir tulpar mingizdi.
«Túrkistan oblysynyń tarıhynda alǵashqy Olımpıada medalin utyp alǵan Sáken ózin úzdik sportshy ekenin kórsetedi. Oǵan barlyǵymyz jankúıer boldyq, kýá boldyq. Bul altynǵa bergisiz qola júlde boldy. Bizge úlken mártebe. Túrkistan oblysynyń barlyq sportshylaryna jeńis tuǵyrynan kórinýge tilektespiz»,- dedi oblys ákimi.
Bokstan Tokıo Olımpıadasynda 52 keli salmaq dárejesinde synǵa túsken 24 jastaǵy sportshy jartylaı fınaldyq jekpe-jekte Ulybrıtanııa sportshysy Galal ıAfaımen kezdesip, Olımpıadanyń qola júldegeri atandy.
«Meni qoldaǵan barsha qazaq eline, halqyma sheksiz alǵysymdy aıtamyn. Árıne, negizgi maqsatymyz altyn bolǵan. Buıyrǵany osy boldy. Allaǵa shúkir deımin. Qazaqtyń atyn álemge tanytý úshin aldaǵy ýaqytta da bar kúsh-jigerimdi salýǵa ýáde beremin»,-dedi Tokıo Olımpıadasynyń qola júldegeri Sáken Bıbosynov.
Sáken Bıbosynov - Túrkistan oblysy, Saıram aýdanynyń turǵyny. Otbasyndaǵy úsh uldyń kenjesi.
Jasynan sportqa jaqyn bolǵan. Aldymen fýtbolmen shuǵyldanyp, keıin úlken aǵasynyń artynan erip, boksqa kelgen.
Ulttyq qurama múshesi. Álem chempıonaty men Azııa chempıonatynyń qola júldegeri. Otandasymyz Tokıo tórinde 4 kezdesý ótkizdi.
Ol Pýerto-Rıka, Frantsııa, Ispanııa boksshylaryn jeńdi. Jalpy Túrkistan oblysynan Tokıo Olımpıadasyna 5 sportshy attanǵan bolatyn.
Sonyń biri - Sáken Bıbosynov qola medalge ıe bolyp, senimdi aqtady.
