Olımpıada júldegeri Ekaterına Larıonova otadan keıin emdelýde
ORAL. QazAqparat - Áıelder kúresinen Rıo Olımpıadasynyń qola júldegeri Ekaterına Larıonova emdelý ústinde. Bul týraly búgin Ortalyq kommýnıkatsııalar qyzmeti óńirlik fılıalynda áıelder kúresinen BQO quramasynyń aǵa bapkeri Musabek Naregeev málim etti, dep habarlaıdy «QazAqparat» tilshisi.
Onyń aıtýynsha, ótken jyly E.Larıonova jaraqatyna qaramastan, olımpıadaǵa joldama alyp, Rıo tórinde tabysty óner kórsetip, qola medalmen oralǵan bolatyn.
«Oń jaq ıyǵynan alǵan jaraqaty mazalaǵannan keıin ol emdelýdi jón kórdi. Germanııada ota jasalyp, ol sátti ótti. Endi bári oıdaǵydaı bolsa, 2018 jyldan bastap jarysqa qosylady. Túpki maqsat - Tokıo Olımpıadasyna joldama alý. Ekaterına júlde alyp kelgennen keıin oblysta qyzdar kúreske kóptep kele bastady. Olardy baptaýmen birge shyńdaý úshin túrli jarystarǵa jıi qatystyrý da qajet», dedi Musabek Naregeev.
Atalmysh brıfıngte 17-18 mamyr kúnderi Oralda erkin kúresten 2001-2003 jylǵy jasóspirimder arasynda ótetin esimi elge belgili jattyqtyrýshylar Amangeldi Zulqashev pen Ótep Moldabekovti eske alýǵa arnalǵan halyqaralyq jarys jaıy da sóz boldy. Erkin kúresten BQO quramasynyń bas bapkeri Baqytjan Ibraevtyń sózine qaraǵanda, oǵan Qazaqstannyń barlyq óńirlerinen, sondaı-aq Reseıdiń Orynbor, Samara, Tolıattı qalalarynan, Daǵystan men Kabardın-Balkar Respýblıkalarynan 350-deı palýan qatyspaqshy. Sonyń ishinde seksennen astamy BQO namysyn qorǵamaq.
