Olımpıada júldegeri Darhan Asadilov karateden ulttyq qurama tizginin ustady

ASTANA. KAZINFORM — Tokıo Olımpıadasynyń qola júldegeri Darhan Asadilov karateden Qazaqstan ulttyq quramasynyń bas bapkeri qyzmetine taǵaıyndaldy.

Qazaqstan karate federatsııasynan málim etkenindeı, Darhan kásibı sportta aıtýly tabysqa qol jetkizgen. 

Bul rette Tokıo Olımpıadasyndaǵy (-60 kg) qola júldeni, álem chempıonatynyń kúmisi (2008) men qolasyn (2018), Gýanchjoýdaǵy Azııa oıyndarynyń altynyn atap aıtýǵa bolady. 

Sondaı-aq ol — sporttyń osy túrindegi eń bedeldi jarys Karate-1 Premer-lıga básekesiniń 8 dúrkin jeńimpazy.

Darhan Asadilov osyǵan deıin Shymkent qalasyndaǵy sport mektebinde jáne Qazaqstan jastar qurama komandasynda jattyqtyrýshy boldy.

Asadilov úshin bas bapker qyzmetindegi alǵashqy halyqaralyq jarys mamyrdyń aıaǵynda Tashkentte ótetin Azııa chempıonaty bolady.

Bas bapkerdiń aldaǵy maqsaty — Ulttyq quramanyń jattyqtyrýshylar qosynyn jasaqtaý, kelesi jyly Japonııada ótetin jazǵy Azııa oıyndaryna tyńǵylyqty daıyndalyp, joǵary nátıje kórsetý.

Eske sala keteıik, budan buryn Astanada dzıýdodan álemdik Qazaqstan Barysy Grand Slam týrnıri ótetinin jazǵan bolatynbyz.