Olımpıada joldamalaryna talasatyn balýandar belgili
ASTANA. 13 sáýir. QazAqparat - Bapkerler keńesiniń sheshimi boıynsha Taıvanda ótetin álemdik irikteý týrnırinde kúresetin balýandar esimi jarııalandy.
Buǵan deıin habarlanǵandaı, 18-22 sáýir aralyǵynda ótetin Qazaqstan chempıonatynda irikteý ótkizilmeıdi.
«Alamannyń» málimetinshe, 27-29 sáýir aralyǵynda Olımpıada joldamalary úshin kúresetin sportshylar tizimi tómendegideı:
Erkin kúresten Qazaqstan quramasynda 84 keli salmaq dárejesinde joldama joq. Astanada ótken Azııa irikteý týrnırynda Semen Semenov jartylaı fınalda súrindi. Endi, Qytaıdyń boz kilemine Ermek Baıdýashev shyǵady. Baıdýashev Azııa oıyndary jáne Azııa chempıonatynyń júldegeri.
Grek-rım kúresinen 55 keli jáne 96 keli salmaqtarynda joldama joq. Astanadaǵy týrnırde Asqat Qudaıbergenov kúresip, jartylaı fınalda álemniń bes dúrkin chempıony ırandyq Hamıt Sýrııanǵa utyldy. Bul joly da Asqat Qudaıbergenovke senim artyldy.
96 kelide de Marǵulan Ásembekov jartylaı fınalda utylǵan bolatyn. Endi, Taıvanda Jasulan Sydyqov baǵyn synamaq.
Áıelder quramasynda 1 lıtsenzııa kem. 55 kelidegi Aıym Ábildınanyń jeńilisinen soń, Aıjan Smaǵulova Qytaıda óner kórsetedi. Ol osy jyly Gýmıda (Koreıa) ótken Azııa chempıonatynda qola medal enshilegen bolatyn.
