Olımpıada jeńimpazdary Almatyǵa oraldy
ALMATY. KAZINFORM – Parıj Olımpıadasyna qatysqan Ulttyq qurama sportshylarynyń bir legi elge oraldy. Olardy almatylyqtar ystyq yqylaspen qarsy aldy.
Almatynyń halyqaralyq áýejaıyna el tarıhyndaǵy sporttyq gımnastıkadan alǵashqy júldeni jeńip alǵan Olımpıadanyń kúmis júldegeri Narıman Qurbanov, tórtjyldyqtyń basty dodasynyń alǵashqy kúni júldeli bolǵan Olımpıadanyń qola júldegerleri Islam Satpaev pen Aleksandra Le, sondaı-aq nysana kózdeý jáne sporttyq gımnastıkadan Ulttyq qurama músheleri men jattyqtyrýshylary bar áýe kemesi qondy.
Frantsııa astanasynda el namysyn abyroımen qorǵap, kók týdy kókte jelbiretken sportshylardy jaqyndary men jankúıerleri, dostary men BAQ ókilderi saltanatty túrde kútip aldy.
27 shilde kúni pnevmatıkalyq vıntovkamen 10 metrge nysana kózdeýden aralas komandalyq synda Islam Satpaev pen Aleksandra Le Olımpıadanyń qola júldesin jeńip aldy.
Al 3 tamyz kúni Narıman Qurbanov Parıj Olımpıadasynda sporttyq gımnastıkanyń at snarıadyndaǵy jattyǵýda kúmis júldege qol jetkizdi.
Eske salaıyq, 5 tamyz kúni Eldos Smetov pen Ǵusman Qyrǵyzbaev bastaǵan olımpıadashylardy almatylyqtar áýejaıdan qarsy aldy.
