OLIMPIADA SPORTShYLARYMEN TANYSÝ: Tumandy Albıonda taekvondo boıynsha Qazaqstan namysyn 3 sportshy qorǵaıdy

«QazAqparat» agenttigi dástúrli túrde aptanyń ár jeksenbisinde osy aıtýly sporttyq sharada Qazaqstannyń namysyn qorǵaıtyn sportshylardy tanystyrýdy jalǵastyrady. Osy joly biz oqyrman qaýymyn Olımpıada oıyndarynda taekvondodan elimizdiń quramasynyń ókilderimen tanystyrmaqpyz.

Atap aıtqanda, osy sport túrinen Qazaqstan namysyn Nursultan Mamaev, Gúlnafıs Aıtmuhambetova jáne Ferýza Ergeshova qorǵaıtyn bolady. Bul úsh sportshyda da osy tartysty dodada jetistikteri az emes.  Osy oraıda, taekvondodan Londonǵa baratyn sportshylarymyzdy tanystyrý barysynda quramanyń bas jattyqtyrýshy Qaırat Qyrǵyzbaevtyń pikirin oqyrman nazaryna usynamyz.

 Nursultan Mamaevqa bizdiń jattyqtyrýshylar úlken senim artyp otyr. On segiz jastaǵy sportshy Qyzylorda oblysynda dúnıege kelgen, al qazir Shymkentte turyp jatyr. Taekvondomen alty jasynan aınalysyp keledi. Ol Qazaqstannyń jasóspirimder arasyndaǵy aǵa jattyqtyrýshy Baýyrjan Amanqulovtan tálim alýda. Nursultan 55 kelige deıingi salmaq dárejesinde 2010 jyly Sıngapýrdaǵy jasóspirimder Olımpıadalyq oıyndarynyń kúmis júldesin jeńip aldy. Qazaqstannyń eresekter quramasy atynan ol byltyrdan beri shyǵyp júr jáne Taılandta ótken Azııa chempıonatynda olımpıdalyq joldamany qanjyǵasyna baılady.

Qaırat Qyrǵyzbaev: «Ol jas ári bolashaǵy bar sportshy. Árqashan da jeńiske degen umtylysy bar. Jasóspirimder Olımpıadalyq oıyndarynyń jas júldegeri bolǵanymen, onda juldyz aýrýy joq. Nursultan jaıynda jaman aıta almaımyn. Bergen tálimdi tez meńgeredi jáne tapsyrmalarǵa tyńǵylyqty bolǵandyqtan men ony qurama qataryna qostym. Olımpıadada ol jaqsy kórsetkishke qol jetkizedi dep úmit artamyz. 58 keli salmaq  dárejesinde synǵa túsý aýyrlaý bolady, alaıda onda jeńiske jetý  múmkindigi bar. Nursultan boıy bıik jigit - 1 metr 80 sm». 

Gúlnafıs Aıtmuhambetova buryndary Reseı quramasynyń sapynda boldy. 1988  jyldyń 2 aqpanynda dúnıege kelgen. Qazaqstanǵa Astrahannan 2009 jyly keldi. Qazirgi kezde Atyraýda turyp jatyr. Reseılik quramanyń atynan shyǵyp júrgende ol Eýropa chempıony atandy. Gúlnafıs búginde halyqaralyq sanattaǵy sport sheberi, Qazaqstan chempıonattarynda eki márte jeńiske jetti. Azııa oıyndarynda qola júldeger atandy.

«Gúlnafıs tik minezdi qyz, ıaǵnı aıtatynyn qaımyqpaı betke aıtady. Bizdiń quramanyń qatarynda jaqsy kórsetkishterge qol jetkizdi. London Olımpıadasynda medal alýǵa onda jaqsy múmkindikter bar», - deıdi Qaırat Qyrǵyzbaev.

Ferýza Ergeshovany bas jattyqtyrýshy komandanyń kóshbasshysy dep atady. Jıyrma jastaǵy Ferýza da aǵa jattyqtyrýshy Baýyrjan Amanqulovtan tálim alýda. Ol 2010 jyly Azııa chempıony boldy. Gýanchjoýdaǵy Azııa oıyndarynda  kúmis júldeni jeńip aldy, sondaı-aq halyqaralyq jarystarda birneshe márte júldeger atandy. Olımpıadalyq joldamany Ferýza Bankgoktegi biliktilik jarystarynda ekinshi oryndy alǵan kezde ıelendi. Londonǵa úkilep otyrǵan bul qyzymyz 67 keli salmaq dárejesinde tartysqa túsedi.

Qaırat Qyrǵyzbaev: «Ferýza óte jaqsy tárbıe alǵan qyz. Ustanymdy ári úlkenderdi qurmetteıdi. Ony komandada jáne Azııada kóshbasshy dep atar edim. Shyn máninde ol óziniń qaısar minezin doda kezinde kórsetedi. Al ómirde Ferýza - qarapaıym. Boıynyń tapaldaý bolǵanynan Olımpıadada oǵan qıyn túsedi. Eýropadan, Amerıkadan keletin qarsylastary boıshań. Biraq ta, Ferýza osy sportty jaqsy meńgergen. Biz onyń jeńisinen úmittimiz».