Olımpıada rezervin daıyndaýdyń birtutas júıesin qurý kerek - Toǵjanov
NUR-SULTAN. QazAqparat – Olımpıada rezervin daıyndaýdyń birtutas júıesin qurý kerek. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.
«Olımpıada rezervin daıyndaýdyń birtutas júıesin qurý ýaqyty keldi. Bul salada túbegeıli is-sharalar qabyldaý qajet. Mınıstrlik, Ulttyq olımpıada komıteti, ákimdikter, ǵylymı ınstıtýttar men federatsııalar sportshylardy daıarlaý barysynda ózderiniń mindetteri men rólderin anyq túsinip, olardy tııanaqty oryndaýy tıis. Osy jumysty úılestirý mınıstrliktiń basty mindeti. Olımpıada rezervin daıarlaý qyzmetin naqty deńgeılerge bólip, árbir deńgeı úshin tıisti normatıvterdi, kórsetkishterdi, jaýapty uıymdardy jáne qarjylandyrý kózderin anyqtaý qajet», - dedi vıtse-premer Mádenıet jáne sport mınıstrliginiń alqa otyrysynda.
Osy rette Eraly Toǵjanov qabiletti sportshylar tıisti normatıvti oryndaǵannan keıin daıarlyqtyń joǵary deńgeıine ótýi tıis ekendigin basa aıtty.
«Jattyqtyrýshylardy óz shákirtterin kelesi deńgeıge ótkizgeni úshin marapattaý mańyzdy. Bul máselemen biraz shuǵyldandym. Joǵary deńgeıge jetken shákirtterin kópshiligi óz qaramaǵynda ustaýǵa yntaly. Sondyqtan osyndaı yntalandyrý júıesinsiz naqty nátıje de bolmaýy múmkin. Osy maqsatta arnaıy syıaqy da engizý máselesin pysyqtaýdy tapsyramyn», - dedi ol.
