Olımpıada oıyndarynyń chempıondary men júldegerleri turǵyn úımen qamtamasyz etiledi - Májilis
ASTANA. QazAqparat - Búgin Parlament Májilisi «Dene shynyqtyrý jáne sport týraly» jańa redaktsııadaǵy zań jobasyn ekinshi oqylymda maquldady.
Qujat negizinen qazirgi zamanǵy úrdisterdi, sport salasyna qoıylatyn talaptardy eskere otyryp, zańnamany jetildirýdi kózdeıdi. Bul rette agenttik álemdik tájirıbeni zerdelep, ásirese buqaralyq sportty damytý máselelerin retteýdiń basty qaǵıdattaryna nazar aýdarǵan. Osyǵan oraı, zań jobasynyń negizgi maqsaty dene shynyqtyrý men sporttyń turaqty júıesin jáne osy salada tıimdi memlekettik basqarýdy qurýdy qarastyrady. Budan bólek, memlekettik jáne qoǵamdyq ınstıtýttardyń ózara birlesken is-qımyldaryn, dopıngtik quraldardy paıdalanýǵa qarsy áreket jáne dene shynyqtyrý men sporttyq is-sharalardy uıymdastyrý jáne ótkizý tártibin júıelendirý boıynsha quqyqtyq tetikterdi belgileý qarastyrylady. Sonymen qatar, zań jobasynda dene shynyqtyrý men sport salasyndaǵy ýákiletti organnyń quzyreti naqtylanady. Sport federatsııalaryn akkredıtteıtin ınstıtýt engizilip, materıaldyq kómekti alý quqyǵy bar adamdardyń - Paralımpıadalyq jáne Sýrdlımpıadalyq oıyndardyń chempıony atanǵan múgedek sportshylardyń tizimi keńeıtildi.Budan bólek, zań jobasy sportshylarǵa QR Memlekettik Ánuranyn bilýdi mindetteıdi.
«Áýesqoı, sol sekildi kásipqoı sport retindegi sport federatsııasynyń quqyqtary men mindetteri bekitiledi. Sporttyń paralımpıadalyq jáne sýrdlımpıadalyq túrleri boıynsha sport jarystarynda teń jaǵdaı jasaý úshin olardyń fýnktsıonaldyq múmkindikteriniń deńgeıi boıynsha múgedek sportshylardyń synyptamasy engiziledi. Olımpıada oıyndarynyń chempıondary men júldegerleri ataǵyn jeńip alǵan sportshylarǵa turǵyn úı berý jónindegi normalar da kózdelip otyr», - deıdi Májilis depýtaty Maıra Aısına.
Budan bólek, múgedek sportshylardy joǵary nátıjelerge qol jetkizýge yntalandyrý sharalary qarastyrylady. Sonyń ishinde Paralımpıadalyq jáne Sýrdlımpııalyq oıyndarynyń chempıondary men olardyń jattyqtyrýshylary ómir boıy aı saıynǵy materıaldyq qamtamasyz etýge quqyǵy bar tulǵalar tizbesine engiziletin bolady. Sonymen qatar, Paralımpıadalyq jáne Sýrdlımpııalyq oıyndarynyń chempıondary men júldegerleri turǵyn úı alýǵa quqyǵy bar Olımpıadalyq oıyndardyń chempıondary men júldegerlerine teńestiriledi.
Májilis maquldaǵan qujat Senattyń qaraýyna joldanady.
