Olımpıada oıyndarynda áıelder kúresinen el namysyn 3 sportshy qorǵaıtyn boldy
ALMATY. 7 mamyr. QazAqparat - Aıym Ábildına taǵy da joldamasyz qaldy. Búgin Fınlıandııanyń Helsınkı qalasynda aıaqtalǵan aqtyq irikteý týrnırinde 55 kelide baq synaǵan Aıym grek-rım kúresindegi óz áriptesteri sekildi birinshi aınalymda súrindi.
Onyń jolyn bul joly moldovalyq Lıýdmıla Krıstı kesti.
Buǵan deıin Astanada ótken Azııalyq irikteý týrnırinde A.Ábildına birinshi aınalymda ózbekstandyq Lılıa Shakırovany utqanymen, jartylaı fınalda týrnır jeńimpazy atanǵan úndistandyq Gıta Gıtaǵa ese jibergen bolatyn. Al 27-29 sáýir kúnderi Qytaıdaǵy Taıvanda ótken irikteý týrnırinde bapkerler senim artqan Aıjan Smaǵulova alǵashqy synda ıtalııandyq Valentına Mıngýzzıdiń osal tusyn taba almaı, jarysty erte aıaqtaǵan edi. Endi Aıym Ábildına ózine berilgen sońǵy múmkindikti taǵy paıdalana almady.
Endi Londondaǵy HHH Jazǵy olımpıada oıyndarynda áıelder quramasy 4 salmaq dárejesiniń úsheýinde ǵana baq synaıtyn boldy. Olar 2011 jylǵy Álem chempıonatynyń qola júldegeri Juldyz Eshımova (48 kg) men úzdik bestikti túıindegen Gúzel Manıýrova (72 kg) jáne Azııalyq týrnırdiń jeńimpazy Elena Shalygına (63 kg).
