Olımpıada oıyndaryna qansha qarajat jumsalǵany belgili boldy

NUR-SULTAN. QazAqparat – Olımpıada oıyndaryna ulttyq komandalardyń daıyndyǵyna 789 mln teńge baǵyttaldy. Bul týraly Beıjińdegi Olımpıada oıyndarynyń qorytyndysy boıynsha baspasóz máslıhatynda Ulttyq Olımpıada komıtetiniń bas hatshysy Andreı Krıýkov aıtty, dep habarlaıdy QazAqparat tilshisi.

«Olımpıada oıyndaryna tikeleı qatysý turǵysynda 248 mln teńge jumsaldy. Sonyń 107 mln teńgesi «Eır Astana» kompanııasyna charterlik reısterdi usynǵany úshin tólendi», - dedi A. Krıýkov Ortalyq kommýnıkatsııalar qyzmetinde.

Onyń aıtýynsha, Olımpıada oıyndaryna ulttyq komandalardyń daıyndyǵyna 789 mln teńge baǵyttaldy. Osy oraıda oqý-jattyǵý jıyny daıyndyǵy men jarystaryna 234 sportshy men bapker qatysty. Bir qatysýshyǵa jumsalǵan qarajattyń ortasha kólemi 15 mln teńge boldy.

Bul rette A. Krıýkov naqty sport túri boıynsha jyl boıynda qansha qarajat baǵyttalǵanyn naqtylady.

Bıatlonǵa – 384 mln teńge, tań shańǵysyna – 100 mln, konkım sporty – 400 mln, shańǵy jarysy- 363 mln, kerlıng – 200 mln, tramplınnen shańǵymen sekirý – 198 mln, snoýbord – 14 mln, konkımen mánerlep syrǵanaý – 143 mln, frıstaıl-mogýl – 562 mln, frıstaıl akrobatıka – 319 mln, shaıbaly hokkeı – 259 mln, short-trekke 392 mln teńge jumsaldy.

«Jalpy, qysqy sport túrlerine bıýdjettik qarjylandyrýda 3,5 mlrd teńge qarastyryldy», - dedi ol.

Budan bólek, Ulttyq Olımpıada komıteti osy olımpıadalyq tsıklge tartqan demeýshilik qarajaty aıtyldy. Osy oraıda 2018 jyly – 365 mln teńge, 2019 jyly – 369 mln, 2020 jyly – 500 mln, 2021 jyly 599 mln teńge baǵyttaldy. Jalpy, demeýshiler esebinen sporttyq baǵdarlamany qarjylandyrýǵa 2 mlrd teńgege jýyq tartyldy.