Olımpıada oıyndary tarıhynda Qazaqstan tý ustaýshylarynyń kıimi úzdik dep tanyldy

NUR-SULTAN. QazAqparat – Beıjińde Qazaqstan komandasy tý ustaýshylarynyń kıimi Olımpıada oıyndary tarıhyndaǵy úzdik kostıým dep tanyldy. Bul týraly Beıjińdegi Olımpıada oıyndarynyń qorytyndysy boıynsha baspasóz máslıhatynda Ulttyq Olımpıada komıtetiniń bas hatshysy Andreı Krıýkov aıtty, dep habarlaıdy QazAqparat tilshisi.

«Tý ustaýshynyń kıimi Olımpıada oıyndarynyń tarıhynda úzdik dep tanyldy. Biz ony sáýir aıyndaǵy resmı rásim kezinde Olımpıada mýzeıine tapsyramyz», - dedi A. Krıýkov Ortalyq kommýnıkatsııalar qyzmetinde.

Osy oraıda Lozannadaǵy mýzeı qonaqtary Qazaqstan sportshylarynyń kıim úlgisin tamashalaı alady.

Qysqy Aq Olımpıada oıyndarynyń ashylý saltanatynda Qazaqstan komandasynyń tý ustaýshylary, konkıshi Ekaterına Aıdova men short-trekshi Abzal Ájiǵalıev tarıhı obrazdaǵy kıimmen shyqty.

Olar saq patshaıymy Tomırıs pen qazaq batyrynyń keıpinde el aldyna shyqty. Komandanyń tý ustaýshylary kıetin kıimde negizinen qazaqtyń ulttyq oıý-órnegi «qoshqar múıiz» beınelengen. Aıta ketelik, órnek elementterin dızaınerler Ábilhan Qasteev atyndaǵy memlekettik óner murajaıymen birlesip daıyndady. Tokıo-2020 Olımpıadasynda da osyndaı qadam jasalǵan bolatyn.

Sonymen qatar, Qazaqstan quramasynyń olımpıada kıimi qytaılyqtardyń nazaryn aýdardy.

Budan buryn habarlanǵandaı, Halyqaralyq Olımpıada komıteti Beıjińdegi qysqy oıyndardaǵy ulttyq quramanyń úzdik sándi kıim úlgisi tizimin jarııalady. Úzdikterdiń qataryna qazaqstandyq sportshylardyń kıim úlgisi kirgen.