Olımpıada oıyndarynyń bes dúrkin chempıony bozkilemge aıaq kıimin qaldyryp ketti

PARIJ. KAZINFORM – Olımpıada oıyndarynda grek-rım kúresinen bes dúrkin chempıon atanǵan ataqty kýbalyq balýan Mıhaın Lopes Nýnes kilemge aıaq kıimin qaldyryp, sporttyq mansabyn aıaqtaǵanyn málimdedi. 

Ol – Kýbanyń asa aýyr salmaqta synǵa túsip júrgen úzdik sportshysy. Mıhaın Lopes Nýnes Parıjde bes dúrkin Olımpıada chempıony degen ataqqa qol jetkizdi.

Áıgili balýan Parıj Olımpıadasynyń fınalynda chılılik sportshy ıAsmanı Akosta Fernandesti 6:0 esebimen jeńdi.

Beldesýden keıin Mıhaın bozkilem ústinde kúreske arnalǵan aıaq kıimin sheship, sol jerge qaldyryp ketti. Lopestiń bul áreketin kópshilik onyń sporttyq mansabyn aıaqtaıtynymen baılanystyrdy. 

Aıta keteıik, qazaqstandyq balýan Demeý Jadyraev jartylaı fınalda ázerbaıjandyq sportshy Sanan Sýleımanovpen kezdesip, qarsylasyn 6:1 esebimen jeńdi. Osylaısha ol Parıj Olımpıadasynyń fınalyna shyqty. 

Esterińizge sala ketsek, Frantsııa astanasy Parıj qalasynda ótip jatqan XXXIII jazǵy Olımpıada oıyndary 11 tamyzda máresine jetedi. Oıyndarǵa álemniń 205 elinen 10 500 sportshy qatysyp jatyr. Olımpıadashylar 32 sport túrinen 329 medal jıyntyǵyn sarapqa salyp jatyr.