Olımpıada oıyndaryn bokssyz elestetý múmkin emes — Baqyt Sársekbaev

ASTANA. KAZINFORM — Bul aqylǵa syımaıtyn, kóńilge qonbaıtyn, múmkin emes dúnıe sııaqty. Beıjiń Olımpıadasynyń chempıony Baqyt Sársekbaev Astanada ótken «Úzdik-2024» premııasynyń marapat keshinde osylaı dedi.

— Baqyt Ábdirahmanuly, Sizdi jaqynda «elimizdiń boks federatsııasynan jańa qyzmet aldy» dep estip jatyrmyz. Bul qanshalyqty ras?

— Buıyrsa aldaǵy ýaqytta ýaqytta eskperımentaldy quramany baptap, 18-22 jas aralyǵyndaǵy qyz-jigitterge óz tájirıbemmen bólisetin bolamyn. Basty negizgi mindetim — quramaǵa rezerv jasaqtaý. Bul mindet men úshin asa jaýapty bolmaq. Qazirgi tańda buǵan qatysty arnaıy josparym bar. Naqty qaı baǵytta jumys isteıtinimizdi aqyldysyp, sheshetin bolamyz.

— Siz bıylǵy Olımpıada oıyndaryna deıin de, Olımpıada oıyndarynan keıin de Ulttyq quramadaǵy olqylyqtar týraly aıtyp, óz pikirlerińizdi aıtyp keldińiz. Sol kemshiliktermen qandaı jumys atqaryp jatsyz?

— Olımpıadadan keıin Ulttyq quramada kóptegen ózgerister oryn aldy. Búkil bapkerler quramy ózgerdi. El birinshiligi keshe ǵana aıaqtaldy. Endi jańa quram jasaqtalady. Keıbir boksshylar salmaq sanattaryn ózgertip jatyr. Jańa jyldan keıin jańasha josparlar men jańasha jumystar júrgiziledi dep oılaımyn.

— Qazirgi tańda boks áleminde neshe túrli daý-damaı júrip jatyr. Tipti, kelesi 2028 jyly ótetin kezekti Olımpıada oıyndarynyń jarys kestesine boks enbeı qalýy múmkin degen qaýesetter bar. Bul múmkin be?

— Birinshiden — Olımpıada oıyndaryna deıin áli tórt jyl bar. Ekinshiden — ol qaýeset. Sondyqtan shyndyqqa janaspaıtyn, naqtyly sheshimin tappaǵan dúnıege bas qatyrýdyń qajeti shamaly. Óz basym Olımpıada oıyndaryn bokssyz elestete almaımyn. Bul aqylǵa syımaıtyn, kóńilge qonbaıtyn, múmkin emes dúnıe sııaqty. Bizdiń basty mindetimiz — talantty boksshy daıyndaý. Biz óz isimizdi júıeli júrgizip, myqty shákirtter tárbıeleı bereıik. Qalǵanyn ýaqyt kórsetedi.

Esterińizge sala keteıik, keshe Astanada «Úzdik-2024» premııasynyń marapattaý rásimi ótken bolatyn.