Olımpıada chempıony Vladımır Smırnov «Astana» PKSK-ni basqardy
ASTANA. QazAqparat - Belgili qazaqstandyq shańǵyshy, Olımpıada chempıony Vladımır Smırnov «Astana» Prezıdenttik kásibı sport klýbynyń bas dırektory qyzmetine taǵaıyndaldy.
«V. Smırnovty barlyǵyńyz jaqsy bilesizder. Onyń halyqaralyq olımpıadalyq komıtetten jınaǵan úlken tájirıbesi bar. Ol sondaı-aq halyqaralyq bıatlonshylar odaǵynyń vıtse-prezıdenti bolǵan. Ol bizdiń shaqyrýymyzdy jerge tastamaı, kelip otyr. Endi búginnen bastap jańa qyzmetine kirisedi», - dep atap ótti «Astana» PKSK qamqorshylar keńesiniń tóraǵasy Darhan Qaletaev.
Onyń aıtýynsha, V. Smırnovtyń mol tájirıbesi «Astana» klýbynyń brendin halyqaralyq arenada oń qyrynan tanyta alady.
Óz kezeginde V. Smırnov «Astana» klýbynyń sport áleminde ózindik orny bar mańyzdy qurylym ekenin atap ótti.
«Astana» PKSK-da Astananyń jańa brendterin jasap, olardy álemge tanytýǵa barlyq múmkindikteri bar. Klýb tek sportshylardyń ǵana emes, sonymen qatar álemdik dárejedegi ınvestorlardy da qyzyqtyra alady. Solar arqyly biz tek ishki ǵana emes, sondaı-aq syrtqy sport ónerin de damyta alamyz», - dedi V. Smırnov.
Aıta keteıik, «Astana» PKSK 2013 jyly qurylǵan bolatyn. Onyń quramyna elimizdiń eń aldyńǵy qatarly sporttyq bedeldi jobalary, máselen, «Astana» BK, «Barys» HK, «Astana Dakar Tım» rallı-komandasy, «Astana» FK, «SK Astana» sý doby komandasy, «Astana» velokomandasy, «Astana Arlans» boks klýby, «Qazaqstan barysy» qazaq kúresin damytý qory jáne basqa da sport ujymdary kiredi. Sonymen qatar, klýbtyń týy astynda aýyr atletıkadan eki dúrkin olımpıada chempıony Ilıa Ilın men Sochı olımpıadasynyń mánerlep syrǵanaýdan qola júldegeri Denıs Ten de óner kórsetedi.
Aıta keteıik, klýbty alǵash ret bokstan olımpıada chempıony Baqtııar Artaev basqardy. Ol 2014 jyldyń sáýir aıynda Ulybrıtanııaǵa oqýǵa ketýine baılanysty qyzmetinen óz erkimen ketken bolatyn.
Smırnov Vladımır Mıhaılovıch 1964 jyly 7 naýryzda Qazaq KSR, Kókshetaý oblysy, Şýche qalasynda ómirge kelgen. 1994 jylǵy olımpıada chempıony, tórt dúrkin álem chempıony, Olımpıada oıyndarynyń tórt dúrkin kúmis jáne eki dúrkin qola júldegeri. Úlken sporttan 1999 jyly ketken. Qazir Shvetsııada turady, degenmen Qazaqstannyń azamattyǵyn saqtap qalǵan. Týǵan qalasy Şýchede jastar shańǵy mektebin quryp, el sportynyń damýyna úlesin qosýda.
