Olımpıada chempıony Serik Sápıevtiń jetistigi qurmetine Astanada janar-jaǵar maı quıý stansasy ashylady

ASTANA. 3 sáýir. QazAqparat - Aǵymdaǵy jyldyń 5 sáýirinde Astana qalasyndaǵy Saýran kóshesinde «QazMunaıGaz» kompanııasynyń janar-jaǵar maı quıý stansasynyń saltanatty ashylýy ótedi.

Ataqty qazaqstandyq boksshy, eki márte álem chempıony, 2012 jylǵy olımpıada chempıony, sondaı-aq 2012 jylǵy Vela Barker kýbogynyń ıegeri Serik Sápıev saltanatty is-sharanyń qurmetti qonaǵy bolady dep kútilýde. Bul kezdeısoq jaıt emes. Sebebi atalmysh stansa Sápıevtiń jetistigi qurmetine salynǵan.

Otandyq sportty qoldaý «QazMunaıGaz Ónimderi» AQ úshin jumystyń negizgi baǵyty bolyp tabylady. Búgingi kúnde «QazMunaıGaz» kompanııasy boks, dzıýdo jáne tennıs federatsııasyna qoldaý kórsetýde.

Stansa sol jaǵalaýda Saýran jáne Hýseın ben Talal kósheleriniń qıylysynda, «EKSPO-2017» halyqaralyq mamandandyrylǵan kórme nysandarynyń qurylysy aýdanynda salyndy. Onyń operatorlyq aýmaǵy 200 sharshy metrdi quraıdy. «QazMunaıGaz» stansasynyń qurylysy barysynda metaldardy jáne plastıkalardy óńdeýdiń jańa tehnologııalary, Eýropada jasalǵan zamanaýı materıaldar, únemdi jaryq, ınnovatsııalyq elektronıka qoldanyldy.

Al onyń qazirgi zamanǵy otyn úlestirý kolonkalary bir ýaqytta 8 kólikke deıin qyzmet kórsete alady. Stansada Aı-80, Aı-92, Aı-95, Aı-98 markaly benzıni men dızel otyny Tokheim markaly 4 segizjeńdi otyn úlestirý kolonkalary arqyly bosatylady.