Olımpıada chempıony Serik Sápıev «Astana» FK qoldaý úshin Madrıdke arnaıy bardy
ASTANA. QazAqparat - Chempıondar Lıgasynyń toptyq kezeńine ótken alǵashqy qazaqstandyq klýbty qoldaý úshin bokstan Olımpıada chempıony Serik Sápıev Madrıdke arnaıy ushyp barǵan. Bul týraly «Astana» fýtbol klýbynyń áleýmettik jelilerdegi resmı paraqshalarynda habarlanyp otyr.
«Ózimizdiń komandaǵa qoldaý kórsetemiz, oıyn qalaı bolar eken dep, komandamyz úshin ýaıymdaımyz. Árıne, «Astana» Madrıdke qosalqy qurammen kelgeni belgili, biraq, soǵan qaramastan, jigitterimizdi namysty qoldan bermeı, myqty qarsylas ekenin kórseter degen oıdamyn. Bir jaǵynan, qosalqy quramdaǵy jigitter de qalaı oınaıtynyn kórsetýi kerek qoı. «Astana» jaqsy oıyn kórsetedi dep úmittenemiz. Árıne, komandamyz jeńse, bizden baqytty jankúıer bolmaıtyn edi, degenmen, teń oıyn kórsetse de, biz «Astana»-ǵa rızamyz», - deıdi S.Sápıev. Esterińizge sala keteıik, ÝEFA Chempıondar Lıgasynyń toptyq kezeńinde «Astana» fýtbol klýby elorda ýaqytymen 21 qazannan 22 qazanǵa qaraǵan túni «Vısente Kalderon» stadıonynda «Atletıko» komandasyna qarsy oınaıdy. Fýtbol Astana ýaqytymen saǵat 00.45-te bastalady jáne «Tań» telearnasynyń tikeleı efırinen jáne telearnanyń saıtynan kórsetiledi.
