Olımpıada chempıony Olga Rypakova kásibı sporttan ketti
ASTANA. QazAqparat – Olımpıada chempıony ári kúmis jáne qola júldegeri, qazaqstandyq jeńil atlet Olga Rypakova kásibı mansabyn resmı túrde aıaqtady, dep habarlaıdy QazAqparat tilshisi.
Qazaqstan jeńil atletıka federatsııasynan málim etkenindeı, ataqty atlet bul týraly Astanada jeńil atletıkadan ótken jabyq keshendegi H Azııa chempıonatynda habarlady.
«Elime rızamyn! Prezıdent pen sport jetekshilerinen bastap meniń eń jas jankúıerlerime deıin bir ǵana, biraq óte mańyzdy nárse – maǵan senimderi úshin alǵys aıtamyn. Meni tulǵa retinde, kásibı sportshy retinde tanytýǵa múmkindik bergen taǵdyrǵa jáne Qudaıǵa alǵys aıtamyn», dedi O.Rypakova.
Otandyq sporttyń damýyna úlken úles qosqany úshin QR Premer-Mınıstri sportshyǵa alǵyshat joldady.
«Sizdiń jarqyn jeńisterińiz qazaqstandyq jankúıerlerdiń júreginde máńgi qalady. Biz sizdiń sportqa jáne prıntsıpterge degen adaldyǵyńyzdy baǵalaımyz. El boıynsha myńdaǵan bala sizden úlgi alady jáne otandyq jeńil atletıka dástúrin jalǵastyrady. Otandyq sportty damytýǵa qosqan úlesińiz úshin zor alǵysymyzdy bildiremiz.
Qurmetpen, QR Premer Mınıstri Álıhan Smaıylov», delingen alǵyshatta.
Saltanat sońynda sportshy jankúıerler aldynda qurmet sheńberin júgirip ótti.
Eske sala keteıik, budan buryn jeńil atletıkadan Azııa chempıonatynda Qazaqstan quramasynyń estafetadan chempıon atanǵanyn jazǵan bolatynbyz.
Sondaı-aq qazaqstandyq jeńil atletter besinshi altyn medal aldy.
Qazaqstan qorjynyna 6-altyn medal tústi.
Foto - Qazaqstan jeńil atletıka federatsııasy
