Olımpıada chempıony qazaqstandyq shańǵyshylardyń nátıjelerine baǵa berdi
ALMATY. QazAqparat - 1994 jylǵy Olımpıada chempıony, tanymal qazaqstandyq shańǵyshy Vladımır Smırnov Phenchhanda ótken Olımpıada-2018 jarysynyń qatysýshylarynyń ónerine baǵa berdi, dep habarlaıdy QazAqparat.
Jankúıerler klassıkalyq stılmen 50 km qashyqtyqqa synǵa túsken Alekseı Poltoranınge úlken úmit artty. V.Smırnovtyń pikirinshe, jankúıerlerdiń A.Poltoranınge degen senimi jaıdan-jaı týyndamaǵan. Jaǵdaıdyń bulaısha óris alýyna Alekseıdiń Álem kýbogynyń kezeńderindegi nátıjeleri yqpal etken.
«Ókinishke oraı, ol qashyqtyqtyń sońyna deıin shydaı almady. Menińshe, ol psıhologııalyq, taktıkalyq turǵydan shydaı almady. Onyń daıyndyǵy jaqsy bolatyn, jeńiske degen umtylysy da durys edi. Jarystyń basynda ol bárin de durys istedi, onyń basty maqsaty «altyn» bolatyn. Eger ol jarys barysynda ózimen jarysqa shyqqandarǵa qarap, psıhologııalyq turǵyda syr bergen bolsa, jaǵdaıǵa qaraı tıisti sheshim qabyldap, taktıkaǵa kóship, eń quryǵanda qolaǵa qol jetkizý kerek edi. Osy mindetti ol oryndaı almady»,-dedi Vladımır Smırnov.
«Al Qazaqstannyń jalpy shańǵyshylar komandasynyń nátıjeleri biz kútpegen jaǵdaı emes. Qazaqstandyqtar estafetada 8-shi oryn aldy. Jeke jarystarda úzdik 30-40-qa endi. Bul orta deńgeıdegi komanda, olardyń nátıjeleri shańǵy sporty Qazaqstanda bar jáne ol jetilip keledi degendi kórsetedi. Ókinishke oraı medal alý turǵysynan kelgende barlyq úmit A.Poltoranınmen baılanysty boldy. Jaǵdaı ózgerýi úshin balalar men jasóspirimder sportyn damytý kerek sııaqty. Óıtkeni bizge bazalyq jumys jetispeıdi. Ol elde balalardyń qysqy sport túrlerine arnalǵan ınfraqurylymnyń joqtyǵymen baılanysty. Sportqa degen qulshynys balabaqshadan bastalady jáne ol sportshyny karerasy aıaqtalǵansha yntalandyryp otyrady»,-dep túıindedi Vladımır Smırnov.
Aıta keteıik, qazaqstandyq Alekseı Poltoranın klassıkalyq stılde 50 km qashyqtaǵy synda 15-shi orynǵa taban tiredi.
