Olımpıada chempıony Ilıa Ilınge tıisti qoldaýlar jasalmaı otyr - M. Ábenov
ASTANA. Qarashanyń 4-i. QazAqparat /Qanat Mámetqazyuly/ - Olımpıada chempıony Ilıa Ilınge tıisti qoldaýlar jasalmaı otyr.
Búgin QR Parlamenti Májilisiniń jalpy otyrysynda Týrızm jáne sport mınıstriniń atyna saýal joldaǵan depýtat Murat Ábenov osylaı málim etti, dep habarlaıdy QazAqparat.
«Ókinishke qaraı, sportshylardan joǵary nátıjeler kútetin kezde biz olarǵa jiti nazar aýdaryp, jan-jaqty jaǵdaıyn jasaımyz, qoldaımyz. Keıinnen álemdik dodadaǵy jeńisteri úshin máz bolyp «tóbemizge kóteremiz». Budan keıingi ómirde sol sportshylardy aqyryndap umyta bastap, tipti keıbireýlerin týyndaǵan problemasymen betpe-bet tastap ketetinimiz de bar. Osyndaı taqyrypty kótere otyryp, burynǵy chempıondarǵa tıisti nazar aýdarmaǵanymyz, olarǵa der kezinde qol ushyn bermegenimiz týraly da mysaldar kóptep keltirýge bolady. Olardyń birazy úlken sportpen qosh aıtyssa, jaıly jaǵdaılar úshin elden ketkenderi de boldy. «Qolda barda altynnyń qadiri joq» demekshi sportshylardyń keıingi qaıǵyly taǵdyry týraly da mysaldar barshylyq. Sondyqtan da, dál qazirgi kúni talantty sportshylarǵa keńinen jaǵdaı jasaýǵa mańyz berý qajet. Osy turǵydan alǵanda, men búgingi kúni elimizge tanymal sportshynyń búgingi jaǵdaıyna nazar aýdarǵym keledi. Bundaǵy másele - jasóspirimder arasyndaǵy eki dúrkin álem chempıony, eresekter arasyndaǵy eki márte álem chempıony, aýyr atletıkanyń álemdik federatsııasy tarapynan jer sharyndaǵy eń myqty atletshi dep tanylǵan, eresekter arasyndaǵy eń jas chempıon retinde Gınnestiń rekordtar kitabyna engen, olımpıada chempıony, «Qurmet» pen «Barys» ordenderiniń ıegeri Ilıa Ilın týraly bolyp otyr», dedi depýtat. Onyń aıtýynsha, Beıjińdegi olımpıada oıyndaryna daıyndyq barysynda eki aıaǵynan birdeı úsh márte aýyr zaqym alyp, keıinnen fınalda qolyn qatty qaıyryp alǵan I. Ilınniń, sol olımpıadadan keıin beli de syr bere bastaǵan. Sondyqtan da, olımpıada chempıony 2010 jylǵy qańtardyń 1-ine deıin jiti jattyǵýlaryn toqtatyp, bul jóninde joǵarydaǵy basshylyqqa resmı eskertpe hat ta joldaǵan eken.
«Degenmen Ilıa áli de eshqandaı dárigerlik tekserýlersiz, em-dom qabyldaýsyz otyr. Budan basqa, aǵymdaǵy jyldyń qyrkúıeginen bastap onyń Ulttyq komandalar shtattyq dırektsııasynan alatyn aılyǵy toqtatylǵan. Demeýshiler tarapynan taǵaıyndalǵan jeke stıpendııasy da mamyr aıynan beri berilmeıtin bolypty. Sondyqtan da búgingi kúni ol tek negizgi qyzmeti boıynsha jalaqy alatyn kórinedi. Al bul qarajattyń ózi emdelý men tekserýden ótýdi aıtpaǵanda, qunarly tamaq ishýge de jetińkiremeıdi. Aıtpaqshy, olımpıada chempıonyna Astana qalasynan berilgen jańa páter de jekemenshik emes, qyzmettik retinde jalǵa beriletin páter eken. Emdelýge tezirek qarajat tabý úshin ony sataıyn dese 2011 jylǵa deıin ne satýǵa nemese basqa bireýge berýge de quqy joq eken. Sondyqtan da bul máseleni jedel sheship, qajet bolsa Úkimettik deńgeıde tıisti sharalardy qamtamasyz etý kerek», dedi depýtat M. Ábenov.
