Olımpıada chempıony Danııar Eleýsinov ózi oqyǵan mektepte boldy
ORAL. QazAqparat - Bokstan Rıo olımpıadasynyń chempıony Danııar Eleýsinov ákesi ári bapkeri Marat Tálipulymen birge kezinde ózi bilim alǵan M.Yqsanov atyndaǵy №36 orta mektepte bolyp, sportpen aınalysatyn oqýshylarmen kezdesti, dep habarlaıdy QazAqparat tilshisi.
Danııar 1998 jyly atalmysh bilim shańyraǵynyń tabaldyryǵyn attap, osynda oqyp, tárbıelengen bolatyn. Kezdesýge bolashaq chempıonǵa «Álippe» ustatqan alǵashqy ustazy Zylıha Ahmetova jáne birge oqyǵan synyptastary keldi. Danııar bala kezindegi partaǵa otyrýdy da umytqan joq.
Mártebeli meımandar mektep shákirtteriniń túrli saýaldaryna barynsha jaýap berip, emin-erkin áńgimelesti.
«Táýelsizdigimizdiń 25 jyldyq mereıtoıy qutty bolsyn. Egemen elimizde sportshylarǵa da barlyq jaǵdaı jasalǵan. Qandaı da bir tabys tek qana eńbekpen, tynymsyz ter tógip, úzbeı jattyǵý arqyly keledi. Senderdiń aralaryńnan da álemdik jarystarda top jaryp, júlde alatyn sańlaq sportshylar shyǵa bersin», - dedi Danııar Eleýsinov.
Kezdesý sońynda mektep dırektory Azıma Ǵubasheva Danııarǵa memleket jáne qoǵam qaıratkeri Mustaqym Yqsanov týraly «Uly tulǵa» kitabyn tartý etse, Olımpıada chempıony oqýshylarǵa qoltańba qaldyrdy. 
