Olımpıada chempıony Danııar Eleýsinov Oralda sheberlik saǵatyn ótkizdi
ORAL. QazAqparat - Búgin bokstan Rıo Olımpıadasynyń chempıony Danııar Eleýsinov Oral qalasyna keldi, dep habarlaıdy «QazAqparat» tilshisi.
Týǵan jerine kelgen dańqty boksshyny oblys ákimi Altaı Kólginov qabyldap, óńirde Elbasy tapsyrmasyna sáıkes sportty damytý, turǵyndar arasynda salaýatty ómir saltyn ornyqtyrý baǵytynda josparly jumystar jasalyp jatqanyn jetkizdi.
Ótken jyly Oralda Danııar Eleýsinov atyndaǵy boks ortalyǵy ashylǵany belgili. Qazirgi kezde munda otyzdan astam tájirıbeli bapkerdiń basshylyǵymen 300-ge jýyq bala jattyǵýda.
Mine, osynda búgin Danııar Eleýsinov arnaıy kelip, sheberlik saǵatyn ótkizdi. Sport sańlaǵynan tálim alǵan jas jetkinshekter erekshe jelpinip qaldy. D.Eleýsinovtiń aıtýynsha, bokspen aınalysýshylardyń kóbeıýine septigin tıgizetin mundaı sharalar aldaǵy ýaqytta da jalǵasyn tabatyn bolady.
Olımpıada chempıony balalarmen erteń de taǵy bir kezdesý ótkizbekshi.
Aıta keteıik, Danııar Eleýsinovteı ataqty sportshy túlep ushqan óńirde kúni búgin 700-den astam jas bokspen aınalysady. 
