Olımpıada chempıony bolýǵa talpynamyn - Sanjar Táshkenbaı

ASTANA. QazAqparat – Tashkenttegi jarysta kórermender Qazaqstan sportshylaryna kúshti qoldaý kórsetti. Bul týraly Jibek Joly telearnasyna bergen suhbatynda bokstan álem chempıony atanǵan Sanjar Táshkenbaı aıtty, dep habarlaıdy QazAqparat tilshisi.

«Osy sátti kóp kúttik. Jeńiske jetý - ár sportshynyń armany. Atap aıtqanda, Tashkentte jankúıer retinde kelgen qazaqtar kóp boldy. Sharshy alańda turǵanda, bapkerlerdiń emes, kórermenderdiń daýysy basym shyqty. Jalpy, jekpe-jekti tamashalaýǵa kelgen adamdardyń qoldaýyn kúshti sezindik. Osy oraıda olardyń barshasyna alǵysymdy aıtqym keledi», - dedi S.Táshkenbaı.

Sonymen qatar ol aldaǵy jospary jaıynda aıtyp berdi.

«Ár sportshy Olımpıada chempıony atanýǵa talpynady. Sondyqtan men de osy maqsatqa jetýdi kózdep otyrmyn», - dedi álem chempıony.

Munymen qosa Sanjar Táshkenbaı jarys chempıondaryna qomaqty syıaqy beriletinin aıta kele, bul júldeni ata-anasyna jáne óziniń bapkerine de bólip beretinin jetkizdi.

«Bapkerimniń de zor eńbegi bar. Jalpy, syıaqyny ata-anama beremin, olar ózderi sheshedi», - dedi ol.

Budan buryn habarlanǵandaı, 13 mamyr kúni Sanjar Táshkenbaı Tashkentte bokstan álem chempıony atandy.

Mádenıet jáne sport mınıstri Ashat Oralov bokstan álem chempıony bolǵan sportshylar qansha syıaqy alatynyn aıtty.

Mınıstrlik álem chempıondarynyń árqaısyna 15 myń dollardan beredi jáne olardyń bapkerlerine de 15 myń dollar qarastyrylǵan. Qazaqstan boks federatsııasynan – 100 myń dollar, AIBA jaǵynan 200 myń dollar beriledi.