Olımpıada chempıony Balandın nege qarqynyn joǵaltyp aldy
Eske salsaq, bir jyl buryn Dmıtrıı Balandın Rıoda ótken Olımpıada oıyndarynda keýdemen júzýde 200 metr ara qashyqtyqty 2:07,46 nátıjemen baǵyndyryp, el qorjynyna «altyn» ákelgen edi.
Bıylǵy maýsymda sportshy óziniń qarqynyn joǵaltyp aldy.
Býdapeshte ótken Álem chempıonatynda Balandın 200 metr qashyqtyqqa júzýden 2:09,69 nátıje kórsetti. Osylaısha ol fınalǵa da óte almaı qaldy.
Ol 100 metrlik qashyqtyqta da jasyndaı jarqyldaı almady.
«Nátıjeler shynymen tómendep ketti. Bıyl kúntizbemde bos ýaqyt bolmady. Kóp sharalar bolǵandyqtan, daıyndyqqa ýaqytym az boldy», - dedi D.Balandın.
Qazir Olımpıada chempıony jazǵy Ýnıversıada oıyndaryna Ulttyq quramamen attanyp barady. Sporttyq doda 19 tamyzda Taıbeıde bastalady.
«Álem chempıonatynan keıin 3 aptadan soń taǵy basqa sport sharasyna attaný ońaı emes, árıne. 2015 jyly Ýnıversıada men álem birinshiligi arasynda osyndaı ýaqyt bolǵan edi. Tek Ýnıversıada oıyndary birinshi bastalǵan bolatyn», - dedi ol.
Sportshy qazir óziniń naǵyz babynda ekendigin aıtty.
«Sýda júzýim burynǵyǵa qaraǵanda jeńildeı bastady. Ózime degen senimdiligim myǵym. Ýnıversıadadaǵy meniń qarsylastarym kim ekenin bilmeımin. Basty qarsylasym - Men ózim», - dedi ol.
Olımpıada chempıony búginde ásker qatarynda boryshyn ótep keledi. Onyń aıtýynsha, «Dınamo» sport klýbynda sportpen aınalysýǵa da, áskerı boryshty óteýge de barlyq jaǵdaı jasalǵan.
Taıbeıde ótetin jazǵy Ýnıversıadada Balandın Qazaqstan namysyn 50, 100, 200 metr qashyqtyqta qorǵaıtyn bolady.
